Ekśpierty nazvali mahčymych stvaralnikaŭ virusa WannaCry
Stvaralnikami virusa-vymahalnika WannaCry, jaki zaraziŭ kampjutarnyja sistemy ŭ 150 krainach, chutčej za ŭsio źjaŭlajucca žychary Hankonha, poŭdnia Kitaja, Sinhapura abo Tajvania. Da takoj vysnovy pryjšli ekśpierty amierykanskaj kampanii Flashpoint, jakaja pracuje ŭ śfiery kibierbiaśpieki, paviedamlajecca na sajcie kampanii.
Vyniki analizu ekśpiertaŭ, na jaki źviarnuła ŭvahu vydańnie South China Morning Post, byli apublikavanyja 25 maja.
Ź vialikaj dolaj imaviernaści aŭtar paviedamleńniaŭ z patrabavańniem «vykupu», jakija źjaŭlalisia na ekranach zaražanych kampjutaraŭ «źjaŭlajecca nośbitam paŭdniovaha dyjalektu kitajskaj movy», udakładniajuć ekśpierty. Na ich dumku, stvaralnik koda vałodaje anhlijskaj movaj, adnak jana nie źjaŭlajecca jaho rodnaj, pra što śviedčać dapuščanyja ŭ tekście pamyłki.
Niekalki terminaŭ, jakija prysutničajuć u tekście, čaściej za ŭsio vykarystoŭvajucca ŭ Paŭdniovym Kitai, Hankonhu, Tajvani i Sinhapury, adznačajecca ŭ paviedamleńni.
Pa dadzienych aŭtaraŭ daśledavańnia, kod pieršapačatkova byŭ napisany na kitajskaj movie, paśla čaho pierakładzieny na anhlijskuju. Z anhlijskaj teksty paviedamleńniaŭ byli pierakładzieny z dapamohaj Google Translate, adznačajuć ekśpierty.
