Lidary G7 abviaścili svaju pazicyju pa antyrasijskich sankcyjach
Reuters.com
Na samicie krain G7 u Italii pryniataja vynikovaja dekłaracyja. Adzin z raździełaŭ ŭ joj pryśviečany sankcyjnaj palitycy ŭ dačynieńni da Rasii. U dakumiencie lidary padkreślivajuć, što antyrasijskija sankcyi vyrazna ŭviazanyja z vykanańniem minskich pahadnieńniaŭ. Adnak pry nieabchodnaści lidary krain «Vialikaj siamiorki» hatovyja zrabić bolš žorstkim ich, «kali spatrebicca».
«Nahadajem, što termin dziejańnia sankcyj vyrazna ŭviazany z poŭnym vykanańniem Rasijaj svaich abaviazacielstvaŭ u ramkach minskich pahadnieńniaŭ i pavahaj suvierenitetu Ukrainy. Sankcyi mohuć być admienienyja, kali Rasija vykanaje svaje abaviazacielstvy. Adnak my taksama hatovyja pryniać dalejšyja abmiežavalnyja miery ŭ dačynieńni da Rasii, kali hetaha zapatrabujuć jaje dziejańni», — havorycca ŭ vynikovaj dekłaracyi.
Samit G7 z udziełam lidaraŭ ZŠA, Hiermanii, Francyi, Vialikabrytanii, Italii, Japonii i Kanady, prachodziŭ 26—27 maja na Sicylii. Niezadoŭha da pryniaćcia vynikovaj dekłaracyi Reuters sa spasyłkaj na krynicu ŭ dypłamatyčnych kołach samitu paviedamlaŭ, što ŭ lidaraŭ «Vialikaj siamiorki» niama ahulnaj dumki ŭ pytańniach, jakija tyčacca Rasii.
Surazmoŭca ahienctva adznačaŭ, što da publikacyi vynikovaha kamiunikie zastajucca ličanyja hadziny, a ŭdzielniki samita jašče nie vyrašyli, ci budzie ŭ zajavie ŭtrymlivacca punkt ab uviadzieńni dadatkovych abmiežavalnych mier u dačynieńni da Rasii.
Napiaredadni ŭ ramkach samita z zajavaj ab sankcyjnaj palitycy ŭ dačynieńni da Rasii vystupiŭ kiraŭnik Jeŭrarady Donald Tusk, a taksama daradca prezidenta ZŠA Hary Kon. Tusk zaklikaŭ lidaraŭ G7 prytrymlivacca svajoj palityki sankcyj u dačynieńni da Rasii. Jon adznačaŭ, što z času apošniaha samita G7 ŭ Japonii, jaki prachodziŭ u minułym hodzie, «my nie ŭbačyli ničoha, što mahło b paŭpłyvać na źmianieńnie našaj palityki sankcyj u dačynieńni da Rasiei».
Kon u svaju čarhu za dzień da samita zajaŭlaŭ, što Tramp pakul nie vyznačyŭsia sa svajoj sankcyjnaj palitykaj u dačynieńni da Rasii. Adnak u pieršy dzień samita jon paviedamiŭ žurnalistam, što ZŠA nie płanujuć źmiakčać sankcyi suprać Rasii i navat nie vyklučajuć mahčymaha ŭzmacnieńnia ich žorstkaści.