Barančyk znoŭ tryźnić: Makiej sprabuje damovicca z amierykancami za śpinaj u Łukašenki
Šaviniscki rasijski sajt «Rehnum» vydaŭ čarhovuju porcyju analityki adnosna Biełarusi i ŭnutrypalityčnaj situacyi ŭ krainie. Ekśpierty sajta sprabujuć praanalizavać vyniki kanfierencyi pa biełaruskaj tematycy, što prajšła 9 maja ŭ Vašynhtonie.
«Pavodle infarmacyi amierykanskich krynic IA REGNUM, Majdan, jaki dziakujučy dziejańniam biełaruskich siłavikoŭ, nie adbyŭsia ŭ Minsku, vychad na druhija pazicyi ŭ dziaržavie pamočnika prezidenta pa nacyjanalnaj biaśpiecy Viktara Łukašenki, a taksama krasavickija damoŭlenaści lidaraŭ Rasiei i Biełarusi ŭ Sankt-Pieciarburhu nanieśli surjozny ŭdar pa prezidenckich ambicyjach Makieja. U vyniku Makiej ŭsurjoz staŭ razhladać varyjant svajho dalejšaha pryznačeńnia na pasadu kiraŭnika biełaruskaha pasolstva ŭ Vašynhtonie paśla naładžvańnia adnosin z Amierykaj i viartańnia ambasadara ZŠA ŭ Minsk.
Pieramoŭščyk Makieja paprasiŭ amierykancaŭ ŭviazać pytańnie adnaŭleńnia dziejnaści pasłoŭ i pryznačeńnia Makieja pasłom Biełarusi ŭ ZŠA, tym bolš tam znachodziacca niekatoryja členy jaho siamji», — adznačaje vydańnie.
Pavodle viersii «Rehnuma» ŭznačalić MZS u vypadku pryznačeńnia Makieja pasłom u Vašynhtonie musić ciapierašni kiraŭnik spravami prezidenta Viktar Šejman.
«Pierad Alaksandram Łukašenkam ŭsio bolš aktualnaj stanovicca prablema jaho ŭłasnaha pierajemnika - kamu mienavita jon pryniasie ŭ achviaru svaju dvuchsensoŭnuju spadčynu i chto mienavita «palityčna pachavaje» Łukašenku-prezidenta.
I tamu centralnaj fihuraj i testam palityčnych padziejaŭ u krainie niepaźbiežna stanovicca mienavita Uładzimir Makiej — mienavita jaho vysunuŭ Łukašenka ŭ apieratary «biurakratyčnaha nacyjanalizmu» i ŭ «svaje chłopcy» dla Vašynhtona, jaki i vyrašaje ciapier los Łukašenki», — adznačaje Rehnum.
Teksty pa svajoj stylistycy vielmi padobnyja na raniejšyja pasyły šef-redaktara «Rehnuma» Juryja Barančyka. Jon užo abvinavačvaŭ ministra zamiežnych spravaŭ Biełarusi Uładzimira Makieja, što jon rychtuje pieravarot na Zybickaj.
Na heta byŭ vymušany reahavać navat Alaksandr Łukašenka, što Makiej robić usio pa jaho daručeńniach, u tym liku narmalizuje adnosiny z Zachadam. A sam Makiej, pa słovach kiraŭnika Biełarusi, vielmi baluča reahuje na takija publikacyi.
Suprać Baranačyka i inšych aŭtaraŭ «Rehnuma» ŭ Biełarusi była zaviedzienaja kryminalnaja sprava pa artykule 130 KK «Raspalvańnie rasavaj, nacyjanalnaj alboj relihijnaj varažniečy». Pa hetym artykule byli zatrymany aŭtary sajta Paŭłaviec, Šyptenka i Alimkin. Barančyk paźbieh aryštu praz toje, što znachodzicca za miažoj, u Rasii.
