Troje školnikaŭ razburyli kala sotni pomnikaŭ na katalickich mohiłkach u Pastaŭskim rajonie
Kala sotni nadmahilnych pomnikaŭ złamyśniki raźbili na katalickich mohiłkach u vioscy Hruzdava Pastaŭskaha rajona. Pravaachoŭniki vyjavili traich padazravanych niepaŭnaletnich, paviedamiła BIEŁTA aficyjny pradstaŭnik UUS Viciebskaha abłvykankama Volha Škuratava.
Fota Radyjo Svaboda
Pabityja pomniki viaskoŭcy zaŭvažyli nie adrazu. Pra vandalizm adna ź miascovych žycharak paviedamiła 13 maja. Na miesca vybyła śledča-apieratyŭnaja hrupa, ale pa haračych śladach znajści złamyśnikaŭ nie ŭdałosia. Apytańnie žycharoŭ vioski dapamahło vyjavić padazravanych.
«Zavadataram akazaŭsia vučań 3 kłasa, chłopčyk prablemny, ź niaščasnaj siamji. Jon padbiŭ jašče dvuch siamikłaśnikaŭ, adzin ź jakich charaktaryzujecca stanoŭča, pajści ź im na mohiłki, kab sabrać cukierki, jakija svajaki pakinuli la nadmahillaŭ u dzień śviatkavańnia Vialikadnia. Adnak zboram ježy sprava nie abmiežavałasia — z chulihanskich pamknieńniaŭ chłopcy raźbili niekalki pomnikaŭ. Pa pryznańni samich dziaciej, z taho dnia jany čynili svaje «svavolstvy» na mohiłkach jašče niekalki razoŭ», — patłumačyła Volha Škuratava.
Pakolki ŭsie troje źjaŭlajucca niepaŭnaletnimi, kryminalnaja sprava nie raspačataja. Pravierka pa fakcie praciahvajecca, kampietentnyja orhany pracujuć z baćkami, jakim pryjdziecca adkazvać za ŭčynki dziaciej. Jany buduć pryciahnutyja da administracyjnaj adkaznaści ŭ vyhladzie štrafaŭ. Akramia taho, kamisija pa spravach niepaŭnahadovych razhledzić pytańnie ab nakiravańni dziaciej u śpiecustanovu.
