Kapiec-haradok i ŭsie-ŭsie-ŭsie — top-7 samych małych haradoŭ Biełarusi FOTY
7. Śvisłač — 6 481 čałaviek
Horad mieścicca ŭ Hrodzienskaj vobłaści la samaj miažy z Polščaj. Mienavita ŭ Śvisłačy znachodzicca adziny ŭ Biełarusi pomnik-biust nacyjanalnamu hieroju Biełarusi Kastusiu Kalinoŭskamu, jaki skončyŭ Śvisłackuju himnaziju, i adziny ŭ Biełarusi pomnik Stalinu.
Pomnik Kalinoŭskamu. Fota euroradio.fm.
Ź cikavaj architektury možna adznačyć Śviata-Kryžaŭźvižanskuju carkvu 19 stahodździa.
Malaŭničaści Śvisłačy dadaje adnajmiennaja raka, što praciakaje praz horad, i bahaty park pry byłoj siadzibie Tyškievičaŭ 18 stahodździa.
Adsiul rodam biełaruski eseist, fiłosaf Valancin Akudovič.
6. Davyd-Haradok — 5 892 čałavieki
Pomnik kniaziu Davydu. Fota Siarhieja Hudzilina.
I pomnik Leninu. Fota Siarhieja Hudzilina.
Horad staić na race Haryń u Stolinskim rajonie Brestčyny.
Davyd-Haradok — adno z najstaražytniejšych pasieliščaŭ na terytoryi Biełarusi. Horad moža pachvalicca zamčyščam 12-ha stahodździa, dzie siońnia staić simvaličny kamień.
Chiba hałoŭnaja architekturnaja słavutaść Davyd-Haradka — draŭlanaja carkva Śviatoha Hieorhija, zbudavanaja ŭ druhoj pałovie 17-ha stahodździa. Simvałam ža horada možna nazvać pomnik kniaziu Davydu, jaki zasnavaŭ Davyd-Haradok.
Darečy, tut naradziŭsia biełaruski piśmieńnik Leanid Drańko-Majsiuk.
5. Vysokaje — 5 113 čałaviek
Vysokaje. Fota Siarhieja Hudzilina.
Vialiki repartaž Siarhieja Hudzilina z Vysokaha
Hety horad taksama znachodzicca la polskaj miažy, u Kamianieckim rajonie Brestčyny.
U Vysokim mieścicca cikavy pałacava-parkavy ansambl Patockich 19-ha stahodździa. Praŭda, ciapier budynki nie ŭ samym lepšym stanie. Siarod słavutaściaŭ horada taksama vyłučajucca staradaŭni Trajecki kaścioł i Kryžaŭźvižanskaja carkva. Mienavita ŭ Vysokim možna ŭbačyć ruiny zamka Sapiehaŭ.
4. Vasilevičy — 3 349 čałaviek
Horad mieścicca ŭ Rečyckim rajonie, pamiž Mazyrom i Homielem. Vasilevičy asabliva ničym nie vyłučajucca. Adznačyć možna chiba što Vasilevickuju Mikałajeŭskuju carkvu, jakoj užo bolš za 190 hadoŭ.
Zatoje horad moža hanarycca tym, što tut naradziŭsia narodny piśmieńnik Biełarusi Ivan Navumienka.
3. Turaŭ — 2 770 čałaviek
Turaŭ. Fota Siarhieja Hudzilina.
Adzin z najstaražytniejšych haradoŭ Biełarusi adkryvaje trojku našaha topa. Niahledziačy na svaju vialikuju tysiačahadovuju historyju sam horad siońnia vielmi mały.
Turaŭ. Fota Siarhieja Hudzilina.
U centry staić admietnaja draŭlanaja Usiaśviackaja carkva, pabudavanaja ŭ 1810 hodzie. La carkvy — pomnik vialikalitoŭskamu dziaržaŭnamu dziejaču Kanstancinu Astrožskamu.
U Turavie možna ŭbačyć staražytnaje haradzišča, dzie mieścicca muziejny kompleks. Tut ža niepadalok staić pomnik Kiryłu Turaŭskamu.
Pomnik Kiryłu Turaŭskamu. Fota Siarhieja Hudzilina.
Akramia taho, na Barysahlebskich mohiłkach horada znachodziacca dva kamiennyja kryžy, što rastuć ź ziamli.
2. Kosava — 1 844 čałavieki
Kosaŭski pałac, taksama viadomy jak pałac Pusłoŭskich. Fota onliner.by.
Mieścicca ŭ Ivacevickim rajonie Bresckaj vobłaści Biełarusi, na race Hryŭda.
I chaj sabie horad zusim nievialiki, dla Biełarusi heta sapraŭdny dyjamient. Siudy pryjazdžajuć z usioj krainy, kab ubačyć na svaje vočy vieličny Kosaŭski pałac 19 stahodździa. I heta daloka nie adzinaje, dziela čaho varta siudy pryjechać.
Muziej-siadziba Tadevuša Kaściuški.
Tut znachodzicca mnostva historyka-kulturnych kaštoŭnaściaŭ: muziej-siadziba Tadevuša Kaściuški 18 stahodździa, Troicki kaścioł, Śviata-Antonijeŭskaja carkva, Kaplica na katalickich mohiłkach, Śviata-Hieorhijeŭskaja carkva na mohiłkach, mahiła ŭdzielnikaŭ paŭstańnia 1863-64 hadoŭ.
1. Dzisna — 1 500 čałaviek
Na druhim bierazie samy mały horad Biełarusi — Dzisna. Fota Siarhieja Hudzilina.
Samy mały horad krainy znachodzicca ŭ Mijorskim rajonie na Viciebščynie. Za apošnija šeść hadoŭ žycharoŭ tut pamienieła na 224 čałavieki.
Kaliści na Dzisienščynie, u majontku Darožkavičy, žyŭ rod Kastravickich, jaki padaryŭ śvietu vybitnaha francuskaha paeta Hijoma Apalinera. Bolš za toje, u knizie byłoha dzisienca «Arlinaje hniazdo», jakaja vyjšła ŭ Polščy ŭ 2003 hodzie, zhadvajecca, što, imavierna, mienavita ŭ hetym majontku, u kaplicy, peŭny čas chavaŭsia Adam Mickievič. Siońnia siadziba Kastravickich znachodzicca ŭ miežach horada, na ŭskrainie.
Akramia Darožkavičaŭ, zachaplajuć svajoj pryhažościu ruiny kolišniaj balnicy.
Na bierazie ŭzvyšajucca ruiny byłoj balnicy. Fota Siarhieja Hudzilina.
I mienavita ŭ Dziśnie chodzić adzin z apošnich paromaŭ na Dźvinie.
Paromščyk. Fota Siarhieja Hudzilina.
Darečy, ź Dziśnienščyny pachodzić słavuty mastak Jazep Drazdovič.
Z historyi Dzisny. Połackija kryvičy zasnavali Dzisnu ŭ 10 stahodździ, pabudavaŭšy tut krepaść Kapiec-haradok. Dzisna była abarončaj fartecyjaj na Dźvinie, na svaim hierbie taksama mieła vyjavu ładździ. Ivan Žachlivy da Dzisny nie dajšoŭ, tamu mienavita siudy źbiehli bahatyja połackija kupcy i šlachta. Tut źbiraŭ vojski Ściapan Batura, kab vyzvalić Połack. Dzisna ad 16 stahodździa mieła mahdeburskaje prava. Dva stahodździ tamu heta byŭ druhi pa kolkaści nasielnictva horad na Połaččynie.
Fota Siarhieja Hudzilina.
Top składzieny pavodle dadzienych Biełstata pa kolkaści nasielnictva ŭ Biełarusi na 1 studzienia 2017 hoda.
