Suprać supracoŭnikaŭ «Pryjorbanka» raspačali kryminalnuju spravu za chałatnaść z apieracyjami chakieraŭ
Mižnarodnaja złačynnaja hrupoŭka skrała bolš za 8 miljonaŭ jeŭra z zamiežnych bankaŭskich rachunkaŭ i pieraviała na rachunak u biełaruskim banku. Pra heta na pres-kanfierencyi raspavioŭ Alaksandr Suško, načalnik upraŭleńnia pa rasśledavańni złačynstvaŭ suprać infarmacyjnaj biaśpieki i intelektualnaj ułasnaści Śledčaha kamiteta.
Reuters.com
Kryminalnuju spravu ab kradziažach z bankaŭskich kart rasśledavaŭ Jeŭrapoł, niekalki fihurantaŭ zatrymali ŭ Biełarusi. Dziejnaść złačyncaŭ zakranuła bolš za 130 tysiač trymalnikaŭ płaciežnych kart z 29 krain, škoda pieravysiła 8 miljonaŭ jeŭra.
Pa dadzienych śledčych, na praciahu 4 miesiacaŭ vykradzienyja hrošy pieravodzili na rachunak u biełaruskim «Pryjorbanku». Sumy pastupali rehularna ŭ roznych sumach ad roznych ludziej. Paśla hrošy byli pieraviedzieny ŭ Kipr, zatym u Łatviju, a tam — abnajaŭlenyja.
Adnak biełaruskija pravaachoŭnyja orhany daviedalisia pra złačynstva tolki praz dva hady paśla paviedamleńnia kalehaŭ ź Niamieččyny. Suprać supracoŭnikaŭ banka raspačali kryminalnuju spravu pa artykule 428 Kryminalnaha Kodeksa Biełarusi «Słužbovaja chałatnaść».
«Bank nie moh nie viedać pra toje, što ŭ dadzienym vypadku ździajśniajecca ašukanskaja schiema, — raspavioŭ Alaksandr Suško. — Nie mienš za 30% apieracyj byli apratestavanyja i abskardžanyja. Na pačatkovym etapie supracoŭniki banka nie mahli vyjavić hetyja apieracyi, heta zrazumieła. Ale ja kažu pra nastupnyja kroki. Pavinna być stvorana sistema biaśpieki, kab reahavać na takija zdareńni».
Śledčyja nie paviedamlajuć, kolki supracoŭnikaŭ banka patrapili pad śledstva. Zaraz rasśledavańnie spravy praciahvajecca. Bank pieravioŭ bolš za 350 tysiač dalaraŭ u metach pakryćcia škody.
