Ułady chočuć źmianić ukaz ab zakinutych viaskovych chatach i čakajuć ad ludziej prapanoŭ
Čynoŭniki vyrašyli adkarektavać ukaz «Ab mierach pa ŭdaskanaleńni ŭliku i skaračeńni kolkaści pustujučych i starych damoŭ u sielskaj miascovaści». Ukaz № 100 «pracuje» piaty hod i, vidać, niedastatkova efiektyŭna, piša Tut.by.
fota Siarhieja Hudzilina
«U metach usiebakovaha razhladu aktualnych pytańniaŭ praktyčnaha prymianieńnia narmatyŭnaha pravavoha akta adbudziecca kruhły stoł z udziełam šyrokaha koła zacikaŭlenych, u tym liku pradstaŭnikoŭ miascovych vykanaŭčych i rasparadčych orhanaŭ, sudździaŭ i prakurorskich rabotnikaŭ, paviedamlaje Nacyjanalny pravavy partał pravo.by. — U suviazi z hetym Nacyjanalnym centram pravavoj infarmacyi da 26 krasavika 2017 hoda ažyćciaŭlajecca zbor prapanoŭ i infarmacyi pa prablemnych pytańniach, źviazanych z prymianieńniem ukaza № 100».
I hramadzianie, i subjekty haspadarańnia mohuć nakiroŭvać svaje prapanovy i zaŭvahi na staronku zvarotnaj suviazi. Abo pakidać prapanovy na pravavym forumie Biełarusi, dzie stvoranaja śpiecyjalnaja tema (dla kamientaroŭ rehistracyja na forumie nie patrabujecca).
Usie prapanovy i zaŭvahi buduć razhledžanyja ŭ ramkach kruhłaha stała i pieradadzienyja raspracoŭnikam prajekta ŭkaza, paviedamlaje partał.
Pa ŭkazie № 100 ŭładalniki abo spadčyńniki pustujučych damoŭ, jakija žadajuć kali-niebudź skarystacca domam, pavinny na praciahu troch hadoŭ paviedamić ab svaich namierach u miascovyja orhany kiravańnia. Prapisanaja paetapnaja pracedura pošuku ŭładalnikaŭ i, kali ŭładalnik nie znojdzieny, padrychtoŭki da znosu (kali vioska, u jakoj jon raźmieščany, nie paličyć patrebnym dom adnavić i vykarystoŭvać).
Pavodle danych Kamiteta dziaržkantrolu, na pačatak 2016-ha hoda pa ŭsioj krainie było vyjaŭlena 13 608 pustujučych damoŭ. Štohod śpis pryrastaje jašče tysiačaj-druhoj.
Čaściakom važdacca z kinutymi chatami miascovyja ŭłady nie chočuć. Tak, dom pusty, sud moža pryznać jaho takim, dom možna źnieści. Ale niaredkija vypadki, kali abjaŭlajucca naščadki paśla znosu — i ŭ miascovych uładaŭ pačynajucca prablemy. Ci dobra šukali uładalnikaŭ? Ci vykanali ŭsie pracedury?
Ź inšaha boku na miascovych čynoŭnikaŭ cisnuć viarchi: niepryhoža, kali ŭ vioskach dźvie traciny chat z pravalenymi dachami, imidž usioj krainy ad takich malunkaŭ pakutuje. Vidavočna, niešta treba mianiać na zakanadaŭčym uzroŭni. Tamu ŭłady i čakajuć prapanoŭ.
