Erdahan nabiraje 51,3% hałasoŭ na refierendumie, kab zastacca va ŭładzie da 2029 hoda
Reuters.com
Bolšaść hramadzian Turcyi, pavodle papiarednich vynikaŭ, prahałasavali na kanstytucyjnym refierendumie za radykalnaje pašyreńnie paŭnamoctvaŭ prezidenta i pieratvareńnie krainy z parłamienckaj u prezidenckuju respubliku.
Pa vynikach padliku pašyreńnie paŭnamoctvaŭ prezidenta padtrymali 51,3 pracentaŭ turak. Jaŭka na refierendumie pieravysiła 86%.
Refierendum byŭ inicyjavany dziejučym prezidentam Turcyi Redžepam Taipam Erdahanam. Z ulikam vynikaŭ hałasavańnia jon zmoža kiravać krainaj da 2029 hoda. U 2019 hodzie adbuducca čarhovyja vybary prezidenta, termin jaho paŭnamoctvaŭ — piać hadoŭ, adzin čałaviek maje prava zajmać hetuju pasadu dva terminy zapar. Ciapierašni termin Erdahana abnulajecca z-za źmieny zakanadaŭstva.
U adpaviednaści z reformaj u Turcyi kasujecca pasada premjer-ministra. Prezident atrymlivaje prava pryznačać ministraŭ i amal usich sudździaŭ Kanstytucyjnaha suda, raspuskać parłamient i ŭvodzić nadzvyčajnaje stanovišča.
Erdahan znachodzicca va ŭładzie ŭ Turcyi z 2003 hoda, kali jon zaniaŭ pasadu premjer-ministra. Rola prezidenta tady była cyrymanijalnaj. Z 2014 hoda jon źjaŭlajecca prezidentam krainy.