Chto taki Piecia Markiełaŭ, asudžany na 12 sutak za strym
Fota Vijalety Saŭčyc.
Piatro Markiełaŭ — udzielnik dazvolenaha Maršu niedarmajedaŭ u Minsku. Jedučy dadomu, Piatro źniaŭ na videa zatrymańnie studentaŭ u tralejbusie — videa nabiare ŭ internecie bolš za 85 tysiač prahladaŭ. Jaho schapili zaadno z tymi, čyjo zatrymańnie jon zdymaŭ, i 16 sakavika staličny Centralny sud asudziŭ jaho na 12 sutak źniavoleńnia.
Svoj prysud jon vysłuchaŭ spakojna, uśmichnuŭsia raschvalavanym siabram i aptymistyčna zapeŭniŭ: «Usio budzie dobra!».
«Usio budzie dobra» — heta pazicyja, ułaścivaja Piatru ŭ pryncypie. Navat adna z supołak, jakuju jon viadzie ŭ Facebook, maje takuju nazvu.
Piotr Markiełaŭ — 22-hadovy chłopiec rodam z Maładziečna. Z šaści hadoŭ žyvie ŭ Minsku, kudy pierajechaŭ razam ź siamjoj. Baćki Piatra — daktary. Sam ža jon nie pajšoŭ u miedycynu i pracuje ŭ halinie prajektnaha mieniedžmientu.
«U hramadskuju dziejnaść Piecia ŭklučyŭsia litaralna ź piataha kłasa, — raspaviadaje jaho maci Iryna Markiełava. — My tady jaho addali ŭ 23-ju biełaruskamoŭnuju himnaziju. I jon užo piacikłaśnikam razam ź siabrami raspaŭsiudžvaŭ nalepki, što ahitavali iści na Płošču ŭ 2006-m».
U 2014-m, u 19 hadoŭ, chłopiec bałatavaŭsia ŭ miascovy Saviet deputataŭ i staŭ viadomy pad brendam «Kandydat Piotr». Budučy samym maładym kandydatam, Piatro sa svajoj inicytyŭnaj hrupaj zmoh pravieści jarkuju kampaniju, admietnuju ironijaj i humaram.
Fota Vijalety Saŭčyc.
Siabry kažuć pra Markiełava, što jon fizična nie moža nazirać niespraviadlivaść: ci to jana prajaŭlajecca na vybarčym učastku pry padliku hałasoŭ, ci padčas zatrymańnia ludziej asobami ŭ cyvilnym.
Maci adznačaje, što «abvostranaje pačućcie spraviadlivaści» pačało jaskrava prajaŭlacca ŭ Pieci jašče ŭ školnyja hady, kali jon, tolki zajmieŭšy mabilny telefon, pačaŭ na jaho z-pad party zdymać nastaŭnicu, jakaja abražała i navat biła vučniaŭ.
Markiełava ŭžo dvojčy adličvali z BDU. Farmalnaja pryčyna — «propuski». Adnak z akademičnaj paśpiachovaściu ŭ Piatra nie było nijakich prablemaŭ da ŭdziełu ŭ vybarach 2014-ha. Prablemy pačalisia adrazu paśla vybarčaj kampanii. I praciahnulisia letaś, kali jon adnaviŭsia na fizfak BDU, a praz try miesiacy byŭ znoŭ adtul adličany paśla historyi sa źjaŭleńniem u korpusie savieckaj simvoliki.
«Moj pradzied (Piecieŭ prapradzied) nastaŭnik Michaś Čatyrka byŭ u svoj čas represavany i zakatavany ŭ HUŁAHu. Moža, hetaje imknieńnie zmahacca ŭ niekatoraj stupieni pieradałosia ŭ spadčynu i Piatru,» — kaža Iryna Markiełava.
Letaś Piatro ŭznačalvaŭ inicyjatyŭnuju hrupu Alesia Łahvinca, paśla razam ź im i inšymi aktyvistami arhanizavaŭ inicyjatyvu «Dzieja».
Fota z supołki «Dzieja» ŭ Facebook.
Jon stvaryŭ sajt kurapaty.by, praź jaki na abaronu ŭročyšča Kurapaty było sabrana 2550 jeŭra. Mienavita jon dapamahaŭ pravaabaroncam-«viasnoŭcam» składać śpis zatrymanych, pakul sam u jaho nie trapiŭ.
