Ludzi adbili ŭ milicyi abaroncu Kurapat, jaki prykavaŭ siabie da MAZa budaŭnikoŭ: «Budu lažać, pakul nie zdochnu» ANŁAJN
Minčuk Siarhiej Palčeŭski pakłaŭsia pad koły hruzavika i prykavaŭ siabie kajdankami da bampiera, kab spynić budaŭničyja raboty ŭ Zialonym Łuzie kala Kurapat.
«Budu lažać, pakul nie zdochnu», — skazaŭ 30-hadovy Palčeŭski. Jon kaža, što pajšoŭ na krajni krok, bo nie bačyć inšych šlachoŭ spynić budaŭnictva na placoŭcy, jakaja raniej uvachodziła ŭ achoŭnuju zonu miemaryjała.
Siarhiej Palčeŭski — minčuk, skončyŭ Biełaruski dziaržaŭny piedahahičny ŭniviersitet, a ciapier zarablaje ciaślarstvam. Raniej jon pracavaŭ majstram na zavodzie «Atłant».
U 2012 hodzie jon pryjšoŭ u Abjadnanuju hramadzianskuju partyju, a krychu bolš za hod tamu paznajomiŭsia sa Źmitrom Daškievičam i staŭ aktyvistam «Maładoha frontu».
Kali pryjechali MNSniki, to jon sam adšpiliŭ kajdanki, kab nie rezali. Milicyja sprabavała zatrymać chłopca, ale ludzi hramadoj adbili.
Voś videa «Našaj Nivy»:
Dla Palčeŭskaha Kurapaty nie pusty huk. U 1937-m byŭ represavany jaho pradzied — Voluś Karalecki. «Jon byŭ z Uździenskaha rajona. Viadoma tolki, što jaho trymali ŭ turmie pad Oršaj, a dzie pachavany — nichto nie viedaje. Heta byŭ baćka majoj babuli pa miačy. Paśla śmierci Stalina jaho reabilitavali».
«Spačatku było choładna, ale potym mianie abkłali koŭdrami, hrełkami», — raskazaŭ «Našaj Nivie» Palčeŭski, jaki pralažaŭ na ziamli kala troch hadzin.
Voś naviny ź miesca padziej ad karespandentaŭ «Našaj Nivy» ŭ režymie anłajn:
Palčeŭski ŭ daždžaviku loh na humovym dyvanku na syruju hlinu.
* * *
Nahadajem, što pačatak budoŭli kala MKAD u Zialonym Łuzie vyklikaŭ abureńnie miascovych žycharoŭ, a taksama ludziej, čyje prodki byli rasstralanyja ŭ Kurapatach u 1929—1941 hadach.
Jak vyśviatliłasia, zabudova łapika miž MKAD i vulicaj Mirašničenki stała mahčymaja, bo ŭ 2014 hodzie hranica achoŭnaj zony vakoł niekropala ŭ Kurapatach była źmienienaja. Miž tym učastak u arendu byŭ vydzieleny ŭ 2013 hoda, što daje farmalnuju nahodu dla admieny rašeńnia.
Pratesty doŭžacca ad paniadziełka 20 lutaha. Unačy na 19 lutaha 15—20 maładzionaŭ u čornym napali na dziasiatak junakoŭ, što vartavali kala budplacoŭki. Napadniki raskidali namiot, sarvali biełaruskija ściahi i pierakulili bočku z vohniščam. Pry hetym jany hukali «Biełaja rasa!».
«Mahčyma, heta byli kursanty ci spartoŭcy», — vykazaŭ mierkavańnie žurnalist Aleś Kirkievič, jakomu padčas hetaha incydenta kałom raźbili hałavu da kryvi. Jahonuju ŭvahu źviarnuŭ toj fakt, što za paru hadzin da źjaŭleńnia citušak z budplacoŭki źnikli milicyjanty-cichary i źjechaŭ «koźlik» z amapaŭcami. Milicyja pravodzić pravierku pa fakcie incydenta.
Kurapaty — miesca, dzie saviety rasstralali dziasiatki tysiač hramadzian Biełarusi. Heta była častka palityki, skiravanaj na vyniščeńnie nacyjanalnych elit, zdolnych uznačalić supraciŭ paniavolenych narodaŭ. U Biełarusi byli zahublenyja praktyčna ŭsie bahatyja sialanie, bolšaść piśmieńnikaŭ, ministraŭ, akademikaŭ, a paźniej, u niekalki pryjomaŭ, sami čekisty, jakija ŭdzielničali ŭ aryštach i rasstrełach.
Pratestoŭcy patrabujuć admieny rašeńnia ab vydzialeńni placoŭki pad zabudovu.
Nahadajem, što ŭ vyniku pratestaŭ u 2013 hodzie ŭdałosia nie dapuścić adkryćcia restarana i zabaŭlalnaha centra «Bulbaš-choł» ź inšaha boku MKAD i Kurapat. Varta adznačyć, što tyja pratesty nie dasiahali takoha nakału.
