U Śvietłahorskim rajonie muž 15-hadovaj maładoj mamy znojdzieny ŭ piatli
Pra heta piša Ranak.by. Pavodle infarmacyi starejšaha śledčaha Śvietłahorskaha RASK Antona Drapiezy, «u dadzieny momant rajonnym adździełam Śledčaha Kamiteta pravodzicca pravierka pa fakcie śmierci žychara Astaškavičaŭ, mužčyny 1988 hoda naradžeńnia. Jaho cieła było znojdzienaje siońnia».
Stała viadoma, što 20 studzienia mužčyna nie vyjšaŭ na pracu. Staršynia sielsavieta zaniepakoiŭsia i pryjechaŭ da jaho dadomu. Dźviery byli začynienyja znutry. Vyklikali supracoŭnikaŭ RANS, jakija adčynili dźviery i znajšli haspadara paviešanym. Prykmiet hvałtoŭnaj śmierci nie vyjaŭlena. Dla vyśviatleńnia dakładnaj pryčyny śmierci pryznačanaja sudova-miedycynskaja ekśpiertyza. Matyvy ŭčynku buduć vyjaŭlenyja ŭ chodzie pravierki.
U kastryčniku 2015 hoda ŭ dačynieńni da zahinułaha, 28-hadovaha Viktara, była raspačataja kryminalnaja sprava. Jak było vyjaŭlena śledstvam, z maja pa kastryčnik 2015 hoda jon ustupaŭ u intymnuju suviaź z adnaviaskoŭkaj 2001 h. n. Adnosiny pamiž darosłym mužčynam i vaśmikłaśnicaj pryviali da ciažarnaści niepaŭnaletniaj.
U 2016 hodzie mužčyna byŭ asudžany. Adnak usio skončyłasia byccam by dobra — školnica i jaje darosły adnaviaskoviec pažanilisia, u ich naradziłasia dačka.
Bližejšaja susiedka zahinułaha adhuknułasia ab im zusim u inšym klučy: «Stanoŭčy byŭ čałaviek. Nie pje, na pracu chadziŭ, nikoli nie prapuskaŭ. Čamu takoje ździejśniŭ? Majo mierkavańnie, jak susiedki, tamu što siamiejnaje žyćcio nie skłałasia z hetaj voś, apošniaj žonkaj. Jana sama dzicia, a jašče i ŭ jaje dzicia na rukach. Ale kab piŭ i biŭ? Nie, nie viedaju takoha».
Siońnia žurnalisty ranak.by pahavaryli z 15-hadovaj udavoj Viktara, Naściaj: «My z kastryčnika razam nie žyli. Pasvarylisia mocna, ja da mamy syšła ź dziciem. Čamu tak zdaryłasia? Kachaŭ mocna. A ja ad jaho syšła. Jon mianie źbivaŭ. I vypivaŭ. Za što źbivaŭ? Prosta tak…»
Jašče adzin adnaviaskoviec taksama vykazaŭsia: «Jon taki chłopiec dobry byŭ! Naohuł nie vypivaŭ! A va ŭsim astatnim śledstva niachaj raźbirajecca».
