U Minsku ŭ navahodnija śviaty projdzie zvyš za 100 mierapryjemstvaŭ
Zvyš za 100 mierapryjemstvaŭ, pryśviečanych sustrečy Novaha hoda i Kaladaŭ, projdzie ŭ Minsku ŭ studzieni-śniežni. Śviatočnaja afiša raźmieščanaja na sajcie Minharvykankama.
by24.org
Tak, minčukoŭ i haściej horada paraduje teatralizavanaje šeście Dziadoŭ Marozaŭ i Śniahurak, jakoje stała ŭžo tradycyjnym. Maršrut kazačnych hierojaŭ 24 śniežnia ŭklučaje pł. Niezaležnaści, pr. Niezaležnaści, vuł. Lenina, Internacyjanalnuju, pł. Svabody. Pačatak zapłanavany na 17.30. U hety ž dzień na terytoryi Vierchniaha horada startuje navahodni pierformans «Čaroŭnaja kraina vykanańnia žadańniaŭ», u Minskaj haradskoj ratušy — prajekt «U haściach u Dzieda Maroza». Ubačyć ich možna budzie štodnia da 5 studzienia.
Na dźviuch placoŭkach horada — na Kastryčnickaj płoščy i la Pałaca sportu — z 15 śniežnia pa 15 studzienia razhorniecca «Kaladny kirmaš», u rajonie Pałaca sportu 24 śniežnia projdzie kirmaš «Kaladnaja zorka».
Hałoŭnaj śviatočnaj placoŭkaj u navahodniuju noč stanie terytoryja kala Pałaca sportu. Tam z 23.00 31 śniežnia da 4.00 1 studzienia projdzie prahrama «Z Novym hodam, stalica!». Praciahnie hulańni z 14.00 da 20.00 prahrama «Čaroŭnaja navahodniaja noč». Fiejervierk adbudziecca 1 studzienia ŭ 1.30.
Taksama ŭ afišy značacca šmatlikija navahodnija pradstaŭleńni, ranišniki, śpiektakli dla dziaciej va ŭstanovach kultury, dziciačych damach, sacyjalna-piedahahičnych centrach, damach sastarełych. U śniežni startujuć dabračynnyja akcyi «Cudy na Kalady», «Našy dzieci» i «Padorym uśmiešku dzieciam!». Moładzievy prajekt «Simfonija tvorčaści» 3,10, 17, 24 śniežnia prezientuje handlovy centr «Stalica».
Svaje mierapryjemstvy padrychtavali i rajonnyja administracyi, Centralny dziciačy park im. M. Horkaha, Minski zaapark, Pałac dziaciej i moładzi, Dziciačaja čyhunka. Taksama ŭ stalicy projduć roznyja spartyŭnyja spabornictvy, u tym liku kaladny mižnarodny turnir amataraŭ chakieja, adkryty turnir «Kubak stalicy» pa tekvando.
Śviatočnyja mierapryjemstvy adbuducca ŭ Minsku i 7 studzienia. A 8 studzienia kala Doma miłasernaści budzie praviedzienaje kaladnaje śviata «Duchoŭnaść siamji — dabrabyt hramadzian». Zavieršacca navahodnija i kaladnyja hulańni 14 studzienia śviatočnym mierapryjemstvam «Ščodryk» u Biełaruskim dziaržaŭnym muziei narodnaj architektury i pobytu.
