Novaja šylda dla Minhandlu kaštavała $2860 FOTA
26 žniŭnia biełaruskaje Ministerstva handlu aficyjna pieraimienavali ŭ Ministerstva antymanapolnaha rehulavańnia i handlu. «Novamu» ministerstvu spatrebiłasia novaja šylda na ŭvachod. Na jaje vytvorčaść byŭ abvieščany tendar.
Košt šyldy… 5600 denaminavanych rubloŭ. Ci $2860 pa kursie na 31 žniŭnia — dzień, kali musiŭ skončycca tendar.
Voś hetaja šylda. Zvonku zdajecca — absalutna zvyčajnaja: pamiery standartnyja, litary nie pazałočanyja. Takija visiać na ŭvachodzie ŭ kožnaje ministerstva! Adkul taki košt?
«My chacieli šyldu za hetuju canu — i nam zrabili za hetuju canu. A byli prapanovy, u jakich stajała vystaŭlenaja bolš vysokaja cana, — raspavioŭ Alaksiej Niavolski ź Ministerstva antymanapolnaha rehulavańnia i handlu. — Šyldu rabili ŭ mastackim kambinacie «Biełaruskaha sajuza mastakoŭ».
Što praŭda, była jašče adna kampanija — «Bronza-art». My ich aryjentavali na hetuju sumu [5600 rubloŭ], jany spačatku nazvali bolšy košt, paśla mienšy… Ale my ź imi tak i nie damovilisia. Jany doŭha dumali, paśla ničoha mnie nie vysłali. Mnie zdajecca, što šylda ad «Bronza-art» była b lepšaj. Kali vas košt biantežyć — dyk u ich, mahčyma, byŭ by i mienšy košt».
Mastacki kambinat HA «Biełaruski sajuz mastakoŭ» maje šmat zamoŭ ad dziaržavy. Tamtejšyja majstry rabili mietaličnyja nadpisy dla stancyjaŭ mietro «Hrušaŭka» i «Malinaŭka», parenčy masta za Nacyjanalnaj biblijatekaj, lićcio dla minskaj Ratušy.
«U nas niama prajs-listoŭ. Našaja praca indyvidualnaja. Raźličvajecca kožnaja kankretnaja praca, — tłumačać na kambinacie. — Spačatku nad zamovaj pracuje dyzajnier, paśla robicca raźlik. Kali cana nie zadavalniaje — znachodzim kampramis, kab zamova ŭsio ž adbyłasia».
