MZS patłumačyła, čamu Biełaruś u AAN sprabavała źniać z paradku dnia hałasavańnie pa Krymie
Pres-sakratar MZS Dźmitryj Mirončyk raspaŭsiudziŭ kamientaryj, u jakim rastłumačyŭ, čamu 15 listapada Biełaruś u AAN sprabavała adkłaści pryniaćcie ŭkrainskaj rezalucyi «Stanovišča ŭ halinie pravoŭ čałavieka ŭ Aŭtanomnaj Respublicy Krym i horadzie Sievastopali (Ukraina)».
Dźmitryj Mirončyk
«Hałasavańnie Biełarusi pa krainavych rezalucyjach ab parušeńniach pravoŭ čałavieka, jakoje adbyłosia 15 listapada ŭ Trecim kamitecie Hienasamblei AAN, stała pradmietam šmatlikich śpiekulacyj u ŚMI, jakija nie majuć ničoha ahulnaha z rečaisnaściu. Darečy, takich dakumientaŭ było čatyry, ale «ŭščyknuć» Biełaruś zachaciełasia z nahody tolki adnaho ź ich, źviazanaha z Ukrainaj», — zajaviŭ Mirončyk.
«Pazicyja Respubliki Biełaruś pa Ukrainie nie źmianiłasia ni na jotu, — padkreśliŭ jon. — Pytańnie ab pracedury razhladu tematyki pravoŭ čałavieka ŭ AAN lažyć zusim u inšaj płoskaści i, zhodna z našym ćviordym pierakanańniem, nie maje nijakaha dačynieńnia da temy terytaryjalnaj cełasnaści Ukrainy».
«Biełaruś na sabie źviedała, nakolki destruktyŭny i niespraviadlivy miechanizm krainavych rezalucyj, i ćviorda ŭpeŭnienaja, što ich pryniaćcie — heta šlach u nikudy. Hetaja praktyka, vypracavanaja ŭ hady «chałodnaj vajny», naviazvajecca Arhanizacyi Ab`iadnanych Nacyj asobnymi krainami vyklučna dla prasoŭvańnia ŭłasnych intaresaŭ. I heta asabliva vidavočna ŭ situacyi, kali mižnarodnaj supolnaściu ŭžo vypracavanaja novaja pracedura — Univiersalnaha pieryjadyčnaha ahladu Savieta AAN pa pravach čałavieka. Jana taksama nie idealnaja, ale jak minimum hruntujecca na raŭnapraŭnym, kanstruktyŭnym i prafiesijnym dyjałohu. I jana daje svoj plon: sama Biełaruś dvojčy prajšła praceduru Univiersalnaha pieryjadyčnaha ahladu i razam z AAN raspracavała nacyjanalny płan pa pravach čałavieka, jaki ŭličvaje rekamiendacyi pravaabarončych miechanizmaŭ arhanizacyi», — adznačyŭ pradstaŭnik źniešniepalityčnaha viedamstva.
«My zaŭsiody adkryta hałasujem suprać krainavych rezalucyj, dzie b jany ni razhladalisia — u Ženievie abo Ńju-Jorku, — padkreśliŭ jon. — Heta nie śviedčańnie padtrymki krain, jakija robiacca ab`iektami rezalucyjaŭ, a śviedčańnie našaha paśladoŭnaha nieprymańnia kryvadušnych padychodaŭ da temy pravoŭ čałavieka, jakija naviazvajucca Arhanizacyi Ab`iadnanych Nacyj asobnymi dziaržavami na pryncypie «ja lepš viedaju, što vam treba rabić».
«My znoŭ pastavili pytańnie ab nieprymalnaści miechanizma krainavych rezalucyj na hałasavańnie ŭ Ńju-Jorku i byli padtrymanyja šeraham dziaržaŭ, uklučajučy Indyju, Indanieziju, Kitaj, Rasiju i inšyja, jakija razam pradstaŭlajuć bolš za pałovu nasielnictva płaniety. Ličym, što heta varty vynik, i praciahniem prytrymlivacca hetaj pryncypovaj linii i nadalej, hałasujučy i suprać razhladu krainavych rezalucyj u cełym, i suprać kožnaj ź ich asobna. Darečy, hetaja pazicyja była daviedzienaja ministram zamiežnych spraŭ Biełarusi Uładzimiram Makiejem svaim kaleham ź inšych krain, jakija źviarnulisia z prośbami ab rastłumačeńniach, u tym liku kiraŭniku MZS Ukrainy Paŭłu Klimkinu, telefonnaja razmova ź jakim adbyłasia napiaredadni hałasavańnia», — paviedamiŭ Mirončyk.
U rezalucyi havorycca pra asudžeńnie «časovaj akupacyi Rasijskaj Fiederacyjaj častki terytoryi Ukrainy — Aŭtanomnaj Respubliki Krym i horada Sievastopala» i paćviardžajecca «niepryznańnie jaje anieksii». U dakumiencie asudžajecca «nacisk na pravy čałavieka, dyskryminacyjnyja miery i praktyka ŭ dačynieńni da žycharoŭ časova akupavanaha Kryma, u tym liku krymskich tataraŭ, a taksama ŭkraincaŭ i asob, jakija naležać da inšych etničnych i relihijnych hrup, z boku rasijskich akupacyjnych uładaŭ». Hienieralnaha sakratara AAN u hetaj rezalucyi zaklikali znajści šlachi i srodki, kab «arhanizavać biaśpiečny i bieśpieraškodny dostup u Krym isnym rehijanalnym i mižnarodnym arhanizacyjam pa nazirańni za stanoviščam u halinie pravoŭ čałavieka».
Prapanovu Biełarusi adkłaści razhlad rezalucyi adchiliła 101 dziaržava, padtrymali 32 krainy, ustrymalisia ad mierkavańnia 37 krain. U vyniku dakumient byŭ uchvaleny hałasami 73 dziaržaŭ pry 76 tych, chto ŭstrymalisia, i 23 hałasach krain, jakija adchilili hetuju rezalucyju.
16 listapada vice-śpikier Viarchoŭnaj rady Ukrainy Iryna Hieraščanka zajaviła ŭ parłamiencie, što pazicyju Biełarusi ŭkrainski bok rasceńvaje jak «nož u śpinu». «My dziakujem biełaruskamu boku za niezaležnuju placoŭku ŭ Minsku i my cenim heta. Ale niezaležnaja placoŭka pavinna być niezaležnaj na ŭsich pazicyjach, a nie anhažavanaj hulnioj na adzin bok», — skazała jana. Hieraščanka zaklikała biełaruskija ŭłady «pavažać prava Ukrainy adstojvać svaju niezaležnaść i suvierenitet», a taksama razumieć, što kali Kijeŭ siońnia «nie abaronić niezaležnaść», to «nastupnym budzie Minsk».
