KPB: Daškievič pavinien padziakavać supracoŭnikam AMAP, jakija jaho zatrymali 7 listapada
U Kamunistyčnaj partyi Biełarusi (KPB) ličać pravakacyjaj akcyju adnaho z maładafrontaŭcaŭ Źmitra Daškieviča na adkryćci pomnika Leninu ŭ Minsku 7 listapada. Pra heta havorycca ŭ raspaŭsiudžanaj pres-słužbaj partyi zajavie.
fota Iryny Arachoŭskaj
«Asobnymi apazicyjnymi ŚMI ŭ suviazi sa sprobaj pravakacyi pry adkryćci pomnika ŭ stalicy było paviedamlena, što nibyta «hrupa moładzi sarvała adkryćcio pomnika Leninu», a «padčas incydentu lidara biełaruskich kamunistaŭ u metach biaśpieki evakujavali», — skazana ŭ tekście. — Infarmujem, što «hrupy moładzi» na mierapryjemstvie nie było, a byŭ staršynia radykalnaj palityčnaj hrupoŭki «Małady front» Źmicier Daškievič u adzinym ekziemplary».
Kamunisty śćviardžajuć, što Daškievič «byŭ evakujavany AMAPam u apieratyŭnuju mašynu paśla taho, jak zalez ź niejkaj razdrukoŭkaj A4 na pastamient pomnika». «Evakuacyja Daškieviča była praviedzienaja supracoŭnikami padraździaleńnia ŭ pozie «marskoj zorki», pad biełyja ruki-nohi. Tym nie mienš aktyvist nie zarehistravanaj u Respublicy Biełaruś arhanizacyi padčas hetaha pracesu prymudraŭsia vykrykvać łozunh «hańba», jaki, imavierna, byŭ adrasavany ahulnaj suśvietnaj niespraviadlivaści. Takim čynam, akcyja «Maładoha frontu» pa zryvie mierapryjemstva doŭžyłasia pryblizna 50 siekund, što, mahčyma, było źviazana jak ź niespryjalnymi mieteaŭmovami, tak i ź niespryjalnaj aŭdytoryjaj», — zajaŭlajuć u KPB.
Pry hetym adznačajecca, što za «evakuacyjaj Daškieviča kiraŭnictva Kampartyi Biełarusi (na čale ź pieršym sakratarom CK namieśnikam staršyni Minharvykankama Iharam Karpienkam) nazirała z zaŭvažnaj dolaj sarkazmu».
«Takim čynam, na dumku kamunistaŭ, evakuacyja Źmitra Daškieviča była ažyćcioŭlenaja ŭ pieršuju čarhu ŭ intaresach samoha Źmitra, za što jamu varta było b padziakavać staličnaj milicyi», — zajavili ŭ partyi.
Nahadajem, Daškievič byŭ zatrymany padčas uračystaj cyrymonii adkryćcia abnoŭlenaha pomnika Leninu, jaki vynieśli z terytoryi MTZ. Jak tolki z pomnika źniali pokryva, Daškievič staŭ vykrykvać «Hańba!». U jaho rukach byŭ arkuš z cytataj Lenina pra toje, jak treba źniščać duchavienstva. U adkaz prysutnyja aktyvisty KPB stali skandavać «Lenin! Partyja! Kamsamoł!» i «Fašyzm nie projdzie!». Niekatoryja nakinulisia na Daškieviča. Jak vyśvietliłasia paźniej, adnym ź ich byŭ druhi sakratar CK BRSM i sakratar CK KPB pa pracy z moładździu Siarhiej Kliševič. Zatym u situacyju ŭmiašalisia supracoŭniki milicyi ŭ cyvilnym i AMAP u formie — aktyvista z užyvańniem siły zatrymali i panieśli ŭ milicejskuju mašynu.
Pavodle słoŭ Daškieviča, pa darozie ŭ RUUS jaho źbivali padhałoŭnikam ad aŭtakresła, zadzirali hałavu i tykali ŭ rot milicejskaj dubinkaj, pramaŭlajučy hrubyja vyrazy seksualnaha źmiestu. U dačynieńni da aktyvista składzienyja try pratakoły. «Pa-pieršaje, pratakoł za praviadzieńnie niesankcyjanavanaha masavaha mierapryjemstva. Užo paśla taho jak ja skazaŭ, što ich dziejańni tak nie pakinu, u milicyi skłali pratakoł za niepadparadkavańnie ich patrabavańniam, — nibyta ja kidaŭsia na amapaŭcaŭ u aŭtobusie. I jašče chulihanstva, što ja sarvaŭ śviatočnaje mierapryjemstva, nibyta zalez na pastamient», — paviedamiŭ aktyvist.
Daškieviču, pavodle jaho słoŭ, adrazu u RUUS sprabavali ŭručyć pozvu ŭ sud na 11 listapada, adnak jon chadajničaŭ ab pieranosie pasiadžeńnia na 16 listapada.
Akramia adnaho ź lidaraŭ «Maładoha frontu» AMAP zatrymaŭ jašče troch aktyvistaŭ: Siarhieja Palčeŭskaha, Arcioma Leŭčanku i Ramana Hančarova. Paśla vyśviatleńnia asoby i składańnia pratakołaŭ ich adpuścili.
