Kanapackaja inicyjuje ŭ Pałacie pradstaŭnikoŭ admienu artykuła KK ab iłžepradprymalnictvie
Deputat Pałaty pradstaŭnikoŭ ad Abjadnanaj hramadzianskaj partyi Hanna Kanapackaja inicyjuje ŭ parłamiencie razhlad zakonaprajekta, jaki admianiaje artykuł 234 Kryminalnaha kodeksa ab iłžepradprymalnictvie.
Pra heta paviedamiŭ staršynia AHP Anatol Labiedźka pavodle vynikaŭ kruhłaha stała «Dekryminalizacyi ekanamičnych adnosin u Biełarusi. Novyja mahčymaści ŭzajemadziejańnia biźniesu i deputataŭ Pałaty pradstaŭnikoŭ», jaki prajšoŭ 29 vieraśnia ŭ Minsku.
«Heta ŭžo druhi kruhły stoł, inicyjavany Hannaj Kanapackaj i ekśpiertnym savietam pry AHP. Siońnia ŭ nas była tema ekanomiki, pradprymalnictva, biźniesu, jakaja vielmi važnaja dla partyi. My pamału pačynajem rabić sproby pierajści ŭ praktyčnaje rečyšča realizacyi prahramy «Miljon novych pracoŭnych miescaŭ», — skazaŭ Labiedźka.
Novaja ekanamičnaja prahrama AHP, adznačyŭ palityk, raźličanaja prykładna na čatyry hady. «Z pradprymalnickimi strukturami, ekśpiertami i ekanamistami u nas poŭny kansensus: pieršym krokam u płanie zakanadaŭčaj inicyjatyvy pavinna być sproba vyklučyć z Kryminalnaha kodeksa artykuł 234 ab iłžepradprymalnictvie. Jon zakranaje šmat ludziej. Siońnia prahučała ličba 8 tys. čałaviek, jakija znachodziacca ŭ turmie z-za ekanamičnych złačynstvaŭ, mnohija ź ich — na padstavie hetaha artykuła. Zrazumieła, što heta nie macioryja zabojcy i rabaŭniki, heta ludzi, jakija mohuć stvarać pracoŭnyja miescy, zarablać hrošy», — zajaviŭ Labiedźka.
Jon paviedamiŭ, što Kanapackaja budzie imknucca vynieści hetaje pytańnie na abmierkavańnie Pałaty pradstaŭnikoŭ užo vosieńniu hetaha hoda. «Pracoŭnaja hrupa, jakuju ŭznačaliŭ namieśnik staršyni partyi Leŭ Marholin, prapanuje płan na pierśpiektyvu da viasnovaj siesii», — skazaŭ palityk.
Jak paviedamlałasia raniej, Kanapackaja maje namier taksama inicyjavać u Pałacie pradstaŭnikoŭ razhlad papravak u vybarčaje zakanadaŭstva.