Subotkin pryznaŭ niezakonnaść svaich dziejańniaŭ i raskajvajecca
Były hienieralny dyrektar ZAT «CHK «Dynama-Minsk» Maksim Subotkin pryznaŭ niezakonnaść svaich dziejańniaŭ i raskajvajecca.
Fota Darji Burakinaj, Tut.by
Havorka idzie pra pieraličeńnie kłubam ZAT «Markietynh CHK «Dynama-Minsk» 400 młn rubloŭ nibyta za padbor pradaŭcoŭ suvienirnaj pradukcyi na chakiejnym čempijanacie śvietu 2014 hoda ŭ Minsku, čym na samaj spravie zajmaŭsia kłub. Skazaŭšy heta, Subotkin raspłakaŭsia, i sudździa byŭ vymušany abviaścić pierapynak.
Subotkin raskazaŭ, što hetaja damova była nieabchodnaja dla padtrymki daččynaha pradpryjemstva ZAT «Markietynh — CHK «Dynama-Minsk», tolki što stvoranaha dla ažyćciaŭleńnia kamiercyjnaj dziejnaści z metaj padtrymki kłuba, ale na jaho rachunku hrošaj naohuł nie było.
«Pryznaju, što vinavaty, što jak hiendyrektar padpisaŭ hetuju damovu, choć štata ŭ markietynhu nie było, a jaho dyrektar ličyŭsia tam na paŭstaŭki. Viedaŭ, što ŭ takoj situacyi pasłuha nie moža być vykananaja», — skazaŭ Subotkin.
Zaraz jon razumieje, što damovy padradu z najmanymi pradaŭcami pavinien byŭ zaklučać nie kłub, a dyrektar «Markietynh — CHK «Dynama-Minsk» i ŭ jaho było takoje prava.
U vyniku Subotkin pryznaŭ, što 400 młn rubloŭ, atrymanych kłubam ad šviedskaj firmy — pastaŭščyka suvienirnaj pradukcyi, byli pieraličanyja «Markietynhu» niezakonna.
Pry hetym źviarnuŭ uvahu suda, što ŭsie hetyja hrošy pajšli na raźvićcio ZAT «Markietynh — CHK «Dynama-Minsk».
***
Subotkin byŭ zatrymany ŭ kancy lipienia 2015 hoda pa abvinavačańni ŭ złoŭžyvańni słužbovymi paŭnamoctvami, što paciahnuła ciažkija nastupstvy ŭ vyhladzie naniasieńnia ŭronu ŭ asabliva bujnym pamiery. Jamu inkryminujuć učynieńnie złačynstvaŭ, praduhledžanych č. 4 art. 210 (kradziež šlacham złoŭžyvańnia słužbovymi paŭnamoctvami), č. 3 art. 424 (złoŭžyvańnie słužbovymi paŭnamoctvami), č. 3 art. 426 (pieravyšeńnie ŭłady abo słužbovych paŭnamoctvaŭ) Kryminalnaha kodeksa.
