Makiej: Biełaruś i ES staviać sabie adny i tyja ž mety
Biełaruś i krainy ES staviać sabie adny i tyja ž mety. Pra heta zajaviŭ siońnia žurnalistam ministr zamiežnych spraŭ Biełarusi Uładzimir Makiej pa vynikach sustrečy ź ministram zamiežnych spraŭ Čechii Lubamiram Zaarałekam.
«Vidavočnaje paciapleńnie adnosin pamiž Biełaruśsiu i Jeŭrapiejskim sajuzam. Dziakuj bohu, usie baki zmahli znajści ŭ sabie siły i pierasiahnuć praź niejkija psichałahičnyja rečy, źviazanyja z peŭnym nieŭsprymańniem adzin adnaho. My zrazumieli, što i Biełaruś, i krainy — siabry Jeŭrapiejskaha sajuza, i Jeŭrapiejski sajuz u cełym majuć adny i tyja ž mety: i ŭ śfiery biaśpieki, i ŭ śfiery handlova-ekanamičnaha supracoŭnictva, i ŭ śfiery ŭdaskanaleńnia hramadstva i dziaržavy», — skazaŭ Uładzimir Makiej.
Adnak paciapleńnie adnosin ź Jeŭrasajuzam, pa słovach ministra, jašče nie aznačaje, što Biełaruś pavinna spynicca na dasiahnutym. «Jašče mnohaje treba zrabić, i heta patrabuje namahańniaŭ z usich bakoŭ. My hatovyja, tamu što ŭ nas, jašče raz paŭtarusia, ahulnyja mety», — źviarnuŭ uvahu dypłamat.
Makiej taksama paviedamiŭ, što na fonie paciapleńnia adnosin, Biełaruś spadziajecca naraścić tavaraabarot z krainami ES.
«My pierakanalisia ŭ tym, što finansava-ekanamičnyja kryzisy pieryjadyčna zdarajucca. Kali ty budzieš zaležać ad adnaho vialikaha partniora, heta ni da čaho dobraha nie pryviadzie. Treba imknucca da taho, kab my mahli ŭ pierśpiektyvie nivieliravać hetyja ekanamičnyja prablemy, jakija mohuć paŭstać, za košt taho, što budziem mieć narmalnyja, roŭnyja adnosiny z usimi našymi asnoŭnymi partniorami», — adznačyŭ Makiej.
U svaju čarhu Lubamir Zaarałek adznačyŭ, što Čechija vieryć u pazityŭnaje i doŭhačasovaje supracoŭnictva ź Biełaruśsiu.
«Naša sustreča — heta dobraje paćviardžeńnie pačatku novaj hłavy ŭ stasunkach pamiž Biełaruśsiu i Čechijaj. Hetaja mahčymaść adkryć novuju hłavu ŭ našych adnosinach vyklikanaja tym, što palapšajucca adnosiny pamiž Biełaruśsiu i Jeŭrapiejskim sajuzam», — skazaŭ Lubamir Zaarałek.
Pavodle jaho słoŭ, krainy mohuć supracoŭničać u śfiery kultury, adukacyi, pramysłovaści, a taksama na mižnarodnaj arenie.
Ministr adznačyŭ taksama vialiki ŭkład Biełarusi va ŭrehulavańnie kryzisu va Ukrainie i aktyŭny ŭdzieł krainy ŭ inicyjatyvie ES «Uschodniaje partniorstva».