Va Uschodniaj Biełarusi ad rehistracyi šlubu da naradžeńnia pieršaha dziciaci ŭ siarednim prachodzić miesiac, u Zachodniaj — 11 miesiacaŭ
Piać niezvyčajnych statystyčnych historyj i tendencyj za 2015 hod.
Biełstat apublikavaŭ dadzienyja ab uzroście ŭstupleńnia ŭ šluby i naradžeńnia dziaciej u Biełarusi za 2015 hod.
Praanalizavaŭšy statystyčnyja źviestki, možna adsačyć siaredniestatystyčny žyćciovy šlach biełarusa i biełaruski.
Pratestanckaje viasielle ŭ Alšanach, Bresckaja vobłaść. Fota Siarhieja Hudzilina.
Pieršy šlub
Biełaruskaja žančyna pieršy raz idzie ŭ ZAHS ŭ siarednim u 25,5 hoda.
U vioskach niaviesty zvyčajna na paŭhoda maładziejšyja. Što da rehijanalnych admietnaściaŭ, to bieraściejki i haradzienki biaruć šlub na hod raniej za siaredniuju ličbu, a minčanki — na hod paźniej.
Jaje abrańniku 27,5 hoda.
I ŭ vioskach, i ŭ haradach ličba amal niaźmiennaja, uzrost adroźnivajecca ŭsiaho na miesiac. Rehijanalnyja tradycyi zachoŭvajucca — zachodniaja Biełaruś rehistruje adnosiny raniej, staličnyja žanichi marudziać.
Pieršaje dzicia
Nakolki adroźnivajecca ŭzrost zaklučeńnia šlubu i ŭzrost naradžeńnia pieršaha dziciaci?
Časam hetyja ličby nie źviazanyja miž saboj, bo niekatoryja dzieci naradžajucca pa-za šlubam. Ale ŭ bolšaści vypadkaŭ (80—85%) dzieci naradžajucca ŭ poŭnych siemjach.
U siarednim praz paŭhoda paśla zaklučeńnia šlubu ŭ maładych siemjach naradžajecca pieršaje dzicia — maci ŭ hety čas roŭna 26 hadoŭ.
Fota Siarhieja Hudzilina.
Ale heta jak siaredniaja tempieratura pa balnicy — nastolki adroźnivajecca situacyja pa rehijonach.
U kansiervatyŭnych Brestčynie i Hrodzienščynie pamiž šlubam i naradžeńniem dziciaci prachodzić 10—11 miesiacaŭ.
Na Minščynie ličba składaje 6 miesiacaŭ, na Viciebščynie — 3,6 miesiaca.
A voś na Homielščynie i Mahiloŭščynie niaviesty čaściakom jeduć adrazu z ZAHSa ŭ raddom — ad rehistracyi pieršaha šlubu da naradžeńnia pieršaha dziciaci ŭ siarednim prachodzić miesiac.
I tolki minčuki nikudy nie śpiašajucca — da naradžeńnia pieršaha dziciaci prachodzić kala 15 miesiacaŭ.
Čarhovyja papaŭnieńni
Kali baćki płanujuć papaŭnieńnie siamji, to druhoje dzicia naradžajecca pryblizna praz dva-try hady paśla pieršynca.
Treciaje i čaćviortaje dzicia paśpiavaje naradzicca, kali maci 30-34 hady (čaściakom heta ŭžo inšy šlub). Da sarakahadovaha ŭzrostu źjaŭlajucca na śviet piataje i šostaje dzicia. Ale takija vypadki, zrazumieła, vielmi redkija.
Razvod
Druhi raspaŭsiudžany šlach razhortvańnia situacyi — razvod.
Pa stanie na minuły hod na kožnyja piać šlubaŭ rehistravalisia dva razvody. Najpraściej rasstajucca sa svaimi abrańnikami ŭ Minsku, najmienš razvodziacca znoŭ ža bieraściejcy i haradziency.
Biełstat pryvodzić dadzienyja ab raźviedzienych parach tolki va ŭzrostavym dyjapazonie. Kali pieranieści hetyja ličby na hrafiki, atrymajecca, što
siaredni ŭzrost razvodu dla žančyn składaje kala 28 hadoŭ, a mužčyn — kala 31 hoda.
Paŭtorny šlub
Kali biełarusy i rašajucca na druhi šlub, to iduć u ZAHS davoli chutka.
Najbolšaj doli mužčyn, jakija ŭziali šlub paśla razvoda, — kala 33 hadoŭ.
Žančyny ž biaruć trochi bolš času na rozdumy. Na rehistracyju druhoha šlubu jany prychodziać u siarednim u 31 hod.
Varyjant, kali biełarusy zaklučajuć šlub paśla śmierci pieršaha spadarožnika žyćcia, nie ŭpłyvajuć na ahulnuju karcinu — takich vypadkaŭ było ŭsiaho kala 3% ad usich šlubaŭ.
Piać niezvyčajnych statystyčnych historyj i tendencyj za 2015 hod
1. Žycharka Bresckaj vobłaści da nastupleńnia 18 hadoŭ paśpieła vyjści zamuž, raźvieścisia i znoŭ pabracca šlubam.
2. 7% šlubaŭ, zarehistravanych letaś, byli pamiž hramadzianami Biełarusi i zamiežnikami. Varyjantaŭ «zamiežnik+zamiežnica» naličyłasia kala 300, siarod ich 28 vypadkaŭ šlubaŭ pamiž ruskimi i ŭkraincami.
3. U haradach anulujuć šluby ŭdvaja čaściej, čym u vioskach.
4. Žančyny ŭ 5,5 razu radziej za mužčyn skančvali žyćcio samahubstvam — 268 suprać 1449.
5. Letaś u ZAHSach krainy naličyli 90 niepaŭnaletnich žanichoŭ i 767 niepaŭnaletnich niaviest.