Šorac: Na zaviaršeńnie budaŭnictva haścinicy la cyrka hrošaj niama. Na arendnaje žyllo taksama
Novych inviestaraŭ dla zaviaršeńnia budaŭnictva haścinicy kala staličnaha cyrka pakul niama. Pra heta paviedamiŭ 4 lutaha na pres-kanfierencyi ŭ Minsku staršynia Minharvykankama Andrej Šorac.
«Na žal, dobrych navin niama, u nas išli pieramovy z «Aščadbankam» Rasii, jaki źjaŭlajecca sainviestaram prajekta. Ale jaho realizacyja pakidaje žadać lepšaha. Inviestara, jaki dabuduje abjekt, pakul na siońniašni dzień niama, choć prachodziać pieramovy, ale damoŭlenaściej niama», — skazaŭ Šorac.
Jon adznačyŭ, što za košt biudžetu i pryvatnych inviestaraŭ da čempijanatu śvietu pa chakiei ŭ mai 2014 hoda było pabudavana bolš za dziasiatak haścinic. Siońnia ŭ Minsku pracuje 47 haścinic amal na 10 tys. miescaŭ. U 2016 hodzie budzie ŭviedziena ŭ stroj jašče čatyry na 2 tys. miescaŭ: «Chiłtan», «Maryjot», na vulicy Kastryčnickaj i la akvaparku «Lebiadziny». «Ja spadziajusia, što prychod dvuch bujnych suśvietnych haściničnych sietak, a jany biaruć na siabie peŭnyja abaviazacielstvy pryciahvać turystaŭ, pavialičyć kolkaść haściej stalicy», — adznačyŭ kiraŭnik Minharvykankama.
«Što tyčycca arendnaha žylla, to, na žal, biudžet u nas u hetym hodzie sfarmiravaŭsia tak, što jaho prosta niama za što budavać. Ciapier my ŭžo padklučyli pryvatnyja pradpryjemstvy i dziaržaŭnyja, prapanavali im na našaj placoŭcy ŭ kvartale «Mahistr» pabudavać arendnaje žyllo dla svaich rabotnikaŭ. Pakul u nas pahadziŭsia tolki «Pielenh». Tapuzidzis, «Karona», na žal, nie pačaŭ realizacyju našych damoŭlenaściej. Choć jany byli. Pałovu doma dla arendnaha žylla chacieli budavać jany dla svaich rabotnikaŭ, pałovu — «Pielenh», — dadaŭ Šorac.
***
Nahadajem, u žniŭni 2015 hoda Alaksandr Łukašenka zajaviŭ žurnalistam, što maje namier «samym žorstkim čynam padahnać» zaviaršeńnie budaŭnictva haścinicy, jakaja raźmiaščajecca kala Biełaruskaha dziaržaŭnaha cyrka na praśpiekcie Niezaležnaści ŭ Minsku. Kiraŭnik dziaržavy adznačyŭ, što budaŭnictva hetaha abjekta dla jaho było «balučym pytańniem». U svoj čas jon daručyŭ dobraŭparadkavać niezavieršany budynak, što paśla i było zroblena, adnak sama haścinica jašče «nie daviedziena da rozumu».
Čakałasia, što haścinica (pieršapačatkova paviedamlałasia, što jana budzie naležać sietcy hatelaŭ «Kiempinski») budzie ŭviedziena ŭ ekspłuatacyju da čempijanatu śvietu pa chakiei ŭ mai 2014 hoda. Pieršapačatkovy termin zakančeńnia rabot — 31 śniežnia 2013 hoda — byŭ pieraniesieny na 1 maja 2014 hoda, zatym termin byŭ pieraniesieny na 31 śniežnia 2015 hoda. Zakazčykam budaŭnictva źjaŭlajecca STAA «Elit Estejt» (zasnavalniki — biełaruski «Trajpł» i maskoŭskaja firma «Sici Estejt»). Dziela haścinicy byŭ źniesieny pomnik architektury — pieršaja biełaruskaja elektrastancyja, pabudavanaja ŭ XIX stahodździ.
