Bo vielmi chaciełasia: tysiača italjancaŭ sinchronna vykanała pieśniu Foo Fighters VIDEA
«I'm looking to the sky to save me, looking for a sign of life, looking for something to help me burn out bright…»
Tysiača muzykaŭ u Čezienie (Italija) vykanała pieśniu «Learn to Fly» hurtu Foo Fighters, kab zaprasić hurt i asabista jaho lidara Dejva Hroła da siabie na kancert. Jak bačna na videa, muzykam dapamahali śpievami šmatlikija hledačy.
«My žyviem na ziamli, dzie mary nialohka stanoviacca realnaściu, ale heta ziamla kreatyŭnaści i pałkaści», — kaža aŭtar prajektu. Pavodle jaho słoŭ, vykanańnie adnoj pieśni rychtavałasia ciaham hoda, muzyki źjechalisia z usioj krainy.
Na momant publikacyi Foo Fighters dajuć «Broken leg tour» pa ZŠA i Kanadzie. Bližej za ŭsio da Biełarusi jany padbiarucca 9 listapada padčas kancerta ŭ Krakavie (Polšča), a ŭ Italii vystupiać 13 i 14 listapada ŭ Kazalekjo-dy-Rena i Turynie. Čezieny ŭ płanach niama.
Tur atrymaŭ nazvu «Broken leg» praz złamanuju nahu vakalista. Dejv Hroł niaŭdała ŭpaŭ na scenie padčas kancerta ŭ Šviecyi, ale ŭ chutkim časie paśla pieršasnaj miedycynskaj dapamohi praciahnuŭ kancert. Na scenu śpievaka z zahipsavanaj nahoj vynosili na nasiłkach, pieršaj «pieśniaj u hipsie» stała jakraz «Learn to Fly». Paśla taho kancertu Foo Fighters raspačali tur, na jakim Hroł vystupaje ŭ hipsie na «žalezna-hitarnym» tronie. Na adnym z kancertaŭ zaśpiavaŭ i doktar Hroła.
***
Dejv Hroł dałučyŭsia da Nirvana ŭ jakaści bubnača ŭ 1990 hodzie. Paśla śmierci lidara Nirvana Kurta Kabejna zasnavaŭ svoj hurt Foo Fighters, na pieršym bieznazoŭnym albomie vykanaŭ usie partyi sam. Na siońnia hurt vydaŭ vosiem studyjnych albomaŭ, što razyšlisia sumarnym nakładam u 12 młn kopij, maje 11 «Hremi» u roznych naminacyjach.
Adnu «Hremi» hurt maje za klip na pieśniu «Learn to Fly». Hetaja pieśnia ŭvajšła ŭ albom 1999 hoda «There Is Nothing Left to Lose», była vydadzienaja na samotniku, što staŭ załatym u ZŠA i Kanadzie.
