Łukašenka: «Biełaruś — častka «Ruskaha śvietu»? Zabudźcie». «Praz paru miesiacaŭ my pačniom vyrablać svaju zbroju»
Raspačałasia vialikaja pres-kanfierencyja Alaksandra Łukašenki. Jana adbyvajecca ŭ Pałacy Niezaležnaści. Na jaje sioleta zaprasili pradstaŭnikoŭ u tym liku niezaležnych ŚMI. Ad «Našaj Nivy» ŭ Pałacy Niezaležnaści prysutničaje namieśnik redaktara Źmicier Pankaviec. Prapanujem anłajn hałoŭnyja vykazvańni kiraŭnika dziaržavy.
Voś što pieradaje Źmicier Pankaviec:
«Niedziaržaŭnych žurnalistaŭ upieršyniu puścili ŭ Pałac niezaležnaści. Raniej padobnyja pres-kanfierencyi prachodzili ŭ Nacyjanalnaj biblijatecy. Zapuskali pradstaŭnikoŭ presy nie z hałoŭnaha ŭvachodu, a zboku. Praz svojeasablivuju prachadnuju. Spačatku pravierka pašparta, paśla prachodziš praź mietałašukalnik.
Vychodziš na vulicu, idzieš praz budučy sad, usie maładyja drevy padviazanyja na zimu. A ŭžo potym zachodziš ułasna ŭ Pałac. Dzie ciabie čakaje druhi mietałašukalnik. Tam ža pradstaŭnik słužby achovy pravodzić asabisty nadhlad. Jak na futbole, prosiać uklučyć noŭtbuk. Tłumačać heta tym, što raptam ty tudy vybuchoŭku zasunuŭ.
Paśla hetaha ty traplaješ u faje Pałaca. Kryštalovyja lustry, bietonnaja padłoha, doŭhija zały z kałonami. Słužby achovy prezidenta asabliva nie zaŭvažna, navat kali jana jość. Žurnalistaŭ nie źmiaścili ŭ niejkaje «hieta», davali volna chadzić pa Pałacu, nie adbirali i telefony z fotaaparatami.
U faje — nievialikaja vystava karcin. Heta toje, što daryli Łukašenku kiraŭniki inšych krain (Vieniesueły, Azierbajdžana, Ekvadora, Vjetnama) i rasijskich hubiernataraŭ. Asabliva ŭražvaje mardoŭski rośpis.
Na ścienach visieli kavanyja vyjavy Nacyjanalnaj biblijateki, Opiernaha teatra, muzieju Vialikaj ajčynnaj vajny. Ahramadny hierb Biełarusi. A voś nadpisaŭ unutry pa-biełarusku, jak ni šukaŭ, tak i nie znajšoŭ.
Žurnalistaŭ častavali cukierkami ad «Kamunarki» i piečyvam. Kubki ŭsie byli ź dziaržaŭnym hierbam.
Adrazu ŭsichniuju ŭvahu źviarnuła, što žurnalistam hetym razam dali vyznačanyja miescy, a nie dali sadzicca advolna. U pieršy šerah ź niedziaržaŭnych pasadzili tut.by, «Priessboł», «Ekonomičieskuju hazietu». U druhi šerah — «Našu Nivu» i «Narodnuju volu». Bolšaści pradstaŭnikam rajonak dali niazručnyja miescy na halorcy.
Sprava ad Łukašenki miesca zaniali čynoŭniki i hałoŭnyja redaktary. Źviarnuła ŭvahu, što čynoŭnikaŭ pa miescach raźmiarkoŭvaŭ Alaksandr Radźkoŭ, jaki niadaŭna staŭ pamočnikam prezidenta, uznačaliŭ jahonuju kancylaryju.
Ułasna sama zała pryjemna ŭražvaje svajoj śvietłaściu. U toj ža Nacyjanalnaj biblijatecy było davoli zmročna. Miesca Łukašenki — pad ahramadnym hierbam. Pobač staić dziaržaŭny ściah. Razam z Łukašenkam na scenie jahonaja pres-sakratarka Natalla Ejsmant-Kirsanava. Jana paprasiła nie stvarać čerhi kala mikrafonaŭ, a jašče, pa mahčymaści, nie fotkać kiraŭnika dziaržavy na mabilniki.
Sam Łukašenka źjaviŭsia biez spaźnieńnia. Roŭna a 11. Paśla nievialičkaj pramovy jon staŭ adkazvać na pytańni».
Va ŭstupnym słovie Alaksandr Łukašenka pieraličyŭ asnoŭnyja padziei hoda. Adznačyŭ eskałacyju mižnarodnaj napružnaści i kryzis u krainach JEAES.
Nie treba zališniaha šumu na hetuju [finansavuju] temu, bo hrošy lubiać cišyniu. Psichałohija hraje vialikuju rolu ŭ tak zvanaj rynkavaj ekanomicy, asabliva adznačyŭ Łukašenka.
Pieršaje pytańnie — ad telekanała «Biełaruś-1». U doŭhim, doŭhim pytańni kaža, postsavieckaja epocha skončyłasia. Vy, kaža, u 90-ja stvaryli novuju madel hramadstva, dajučy ludziam mahčymaść narmalna žyć. Moža vy znoŭ usich ździvicie i, jak u 90-ja, znoŭ prapanujecie novuju madel ekanomiki i kiravańnia?
Adkažu koratka, skazaŭ Łukašenka, i adkazvaje ŭžo dvaccatuju chvilinu. «Ci hatovaje hramadstva da vialikich navacyj? Dumaju, što nie zaŭždy. Madelaŭ nie zašmat, i my ich viedajem. U nas była sacyjalna-aryjentavanaja madel, i my ad jaje nie admovimsia. Treba pa im iści nie šarachajučysia navat u pieryjad kryzisu». Jon adznačaje, što ludzi nie lubiać zastoju, a lubiać pieramieny, taki ŭžo charaktar ludziej.
«Što ciapier kažuć pra brežnieŭskija časy? Što heta byli najlepšyja časy». «Naš narod nie pieražyŭ tych biedaŭ i taho hora, jakija pieražyli našy susiedzi i našy braty ŭ Savieckim Sajuzie». My adnaŭlali našu ekanomiku, byŭ raschožy tezis «zapuścić pradpryjemstvy», apazicyja ź mianie śmiajałasia, «kudy ŭžo dalej zapuskać», ale my zachavali ŭsio lepšaje. Ciapier to my ŭžo razumnyja, razumiejem, što nielha dapuskać abvalnaj pryvatyzacyi, stvareńnia aliharchičnaha kapitału. My z 30 dołaraŭ, jakija była tady zarpłata, vyjšli na lepšy ŭzrovień.
Tak, śviet siońnia nie vyjšaŭ z kryzisu, tolki Amieryka i Kitaj zadychali, i tut našy susiedzi trapili ŭ kryzis, raskazvaje Łukašenka.
Jon źviazvaje pierachod na «novuju madel» z zakryćciom pradpryjemstvaŭ. Kudy pojduć ludzi? — rytaryčna pytajecca Łukašenka. Chto budzie finansavać adukacyju, achovu zdaroŭja?
Jon krytykuje vyraz «patrebny strukturnyja reformy».
Madelaŭ — niašmat, paŭtaraje jon. My ŭziali najlepšaje z taho, što mieli. My zapuścili pradpryjemstvy, jany niakiepska pracavali i buduć pracavać, ja harantuju, kaža jon. Nas možna pakrytykavać, što niedastatkova chutka dyviersifikavali naš ekspart.
Jon pastaviŭ sabie ŭ zasłuhu, što ekspart u Rasiju źniziŭsia da 42% ad ahulnaha abjomu ekspartu. Dyviersifikacyja ekspartu daje ŭstoŭlivaść sistemy, kaža.
Ekspart, žytło, charčavańnie - hety łozunh ź pieršych prezidenckich vybaraŭ zastajecca aktualny, kaža Łukašenka. Hanarycca tym, što ekspart praduktaŭ charčavańnia ź Biełarusi dasiahnuŭ 7 młrd dalaraŭ.
«Tamu, pieršaje, nielha šarachacca, ni ŭ žyćci, ni kali datyčyć dziaržavy», — padsumoŭvaje Łukašenki. «Ja mahu prapanavać dźvie žorstkija madeli, ale vy ich nie vytrymajecie», — zaścierahaje Łukašenka. Šlach šokavaj terapii nam nieprymalny, amierykanskaja madel nam nieprymalnaja, bo buduć bandy na vulicach i majdany.
My čakajem vajnu ŭ kibierprastory, nie čas šarachacca.
Łukašenka nie jeść bananaŭ
Druhoje pytańnie — ad BiełTA pra JEAES.
Adkažu koratka, kaža Łukašenka znoŭ, i na hety raz adkazvaje 12 chvilin.
Siarod inšaha, kaža, što nie jeść bananaŭ.
«Voś kaštavaŭ, da prykładu, banan dalar, h.zn. raniej heta było 10 tysiač. Ciapier dalar padskočyŭ i banan kaštuje 13—14 tysiač», - skazaŭ A. Łukašenka ŭ čaćvier na pres-kanfierencyi ŭ Minsku, kamientujučy situacyju ź impartam.
«Ja banany nie jem i mnohija z vas taksama. Pierabjomsia», — dadaŭ jon.
Apałohija Siamaška, Kosiniec haračy, Kabiakoŭ daśviedčany
Treciaje pytańnie — ad STV. Urad pamianiali, ale tam taja samaja kałoda. Niama ni zamiežnikaŭ, ni pradstaŭnikoŭ apazicyi. Ci buduć jašče kadravyja pieramieny?
Alaksandr Łukašenka raskazvaje ab pryncypach ratacyi ŭ kadravaj ijerarchii.
Łukašenka vysoka aceńvaje patencyjał Kosinca.
«U luboj krainie premjer-ministry na vulicy nie valajucca. Premjeram mohuć być hubiernatary, ministry, vice-premjery i asoby z najvyšejšych pasdaŭ».
Raskazvaje pra Kabiakova. Kaža, kiraŭnik Administracyi prezidenta — strašnaja pasada. «I na joj jon vyžyŭ». «My ŭsie ź niedachopami», — kaža jon.
Kaža, što Kosiniec — haračy čałaviek. Jak pojdzie ź Minska, moža da Viciebska dajści. Adznačaje, što miž Kosincam i Kabiakovym jość supiarečnaści.
Ministra praściej znajści, najlepšyja kiraŭniki pradpryjemstvaŭ mohuć stać ministrami. A voś na pasadu premjera i kiraŭnika Administracyi — składaniej.
Nazyvaje Siamašku vielmi kvalifikavanym śpiecyjalistam, prafiesijanałam, «jon jak buldoh u pieramovach». «Dyk što, mnie źviartać uvahu, što Siamaška niaŭžyŭčyvy? Ja jamu prapanoŭvaŭ i inšyja pasady, jon paprasiŭ padumać da viečara. Nu, kali možna, to ja jašče tut papracuju», — namiaknuŭ Łukašenka, što prapanoŭvaŭ Siamašku pasady ŭ tak zvanym «nacyjanalnym schodzie».
Kaža, što ŭ Biełarusi niama kłanaŭ, hrupaŭ pa intaresach. Kaža, što patrabuje na kožnaha čałavieka pierad pryznačeńniem infarmacyju «ad troch viedamstvaŭ».
Kaža, što kadry pavinny prajści «ziamlu», nizavyja pasady na pradpryjemstvach.
Kaža, što nikoha nie pakryŭdzili, usim dali rabotu, navat Rubinavu, jakomu 75 hadoŭ.
Kandydaturu Kačanavaj prapanavali siłavyja struktury
Na kandydaturu vice-premjera Natalli Kačanavaj uvahu Alaksandra Łukašenki źviarnuli «siłavyja struktury», raskazaŭ jon na pres-kanfierencyi ŭ Minsku 29 studzienia.
«Navat ciažka skazać, što Kačanava paniuchała i pakaštavała, jana ž išła pa ŽKH», — raskazaŭ pra jaje Łukašenka. «Prapanova pa naznačeńni Kačanavaj pryjšła ad siłavych struktur. Ja paprasiŭ Andrejčanku piśmova paručycca. Jon adazvaŭsia stanoŭča».
Paśla była znoŭ prapanova ad siłavych struktur źviarnuć uvahu na hetuju kandydaturu ŭ časie adboru kandydataŭ u novy ŭrad.
«Jana naturalnym čynam pryjšła na hetuju pasadu, sumlenna pracujučy na svaich pasadach», — padsumavaŭ Łukašenka.
Pad siłavymi strukturami treba razumieć śpiecsłužby.
Ahułam na pieršyja try pytańni Łukašenka adkazvaŭ hadzinu.
Biełaruś padtrymała Kazachstan
Čaćviortaje pytańnie — ad «Sovietskoj Biełoruśsii», pra intehracyjnyja pracesy, pra «sajuznuju dziaržavu Biełarusi i Rasii».
Sajuznaja dziaržava zastajecca łakamatyvam intehracyi, adkazaŭ Łukašenka, ale JEAES, sapraŭdy, stała pryjarytetam. Jon dvojčy adznačyŭ, što suprać palityčnaj intehracyi ŭ ramkach JEAES pieršym vystupiŭ Kazachstan, a paśla i Biełaruś dałučyłasia da jaho pazicyi.
«My małodšy brat, daŭžej žyć budziem»
Ahienctva Rojterz: Biełaruś niečakana dla mnohich vystupiła miratvorcam va ŭkrainskim kanflikcie. U suviazi z hetym ci adčuli Vy źmienu staŭleńnia z boku Zachadu?
Alaksandr Łukašenka jašče raz zaklikaŭ udzielnikaŭ vykazvać svaje mierkavańni pa pytańniach, jakija zadajuć.
My try braty i try siastry — Rasija, Ukraina i Biełaruś. «My małodšy brat, daŭžej žyć budziem», — zaŭvažyŭ Łukašenka.
«Hetaja vajna — a heta vajna — jana kala našaha paroha», — adznačyŭ Łukašenka.
Nam davodzicca ŭžo hranicu zakryvać [macniej kantralavać], adznačyŭ jon.
«Ale heta jašče nie vajna [nie poŭnamaštabnaja vajna]», — praciahvaje Łukašenka.
Jon adznačyŭ, što prośbu dapamahčy sabrać baki ŭ Minsku asabliva prasiŭ Piatro Parašenka. Biełaruś daviała svaje prapanovy i da Ukrainy, i da Biełarusi, i da DNR i ŁNR, adznačyŭ jon.
Zruchaŭ u adnosinach z Zachadam nie budzie da prezidenckich vybaraŭ
Alaksandr Łukašenka zajaŭlaje, što bačyć peŭnaje paciapleńnie ŭ adnosinach respubliki ź Jeŭrasajuzam i ZŠA dziakujučy pazicyi aficyjnaha Minska pa ŭkrainskim kryzisu, ale nie schilny asabliva hetamu daviarać.
«Što tyčycca adnosinaŭ Jeŭropy i Amieryki. Viadoma, ja baču, što adbyvajecca ŭ našych zachodnich partnioraŭ u suviazi z hetym. Ale ja nie ŭpivajusia hetym, što voś skłałasia situacyja i jana nam dapamahła. Ja nie vielmi daviaraju zachodnim partnioram. Heta palityka, a jana brudnaja sprava, u kahości čyściej, u kahości brudniejšaja, ale heta palityka», — skazaŭ A.Łukašenka na pres-kanfierencyi ŭ čaćvier u Minsku.
«Siońnia Zachadu vyhadnaja takaja pazicyja Biełarusi, jany kažuć nam dziakuj. Ja heta baču. Ale ja prahmatyk Nijakich vialikich zruchaŭ u adnosinach da Biełarusi nie budzie, pakul nie projduć prezidenckija vybary…», — skazaŭ Łukašenka.
Jon padkreśliŭ, što adzinaje, da čaho varta imknucca — heta da spynieńnie krovapralićcia va Ukrainie.
«Adzinaje, što ja chacieŭ by, kab i Jeŭropa, jakuju hety kryzis chvaluje, i ZŠA, i Rasija, jakaja vielmi ŭciahnutaja ŭ hety kryzis, i Biełaruś — a isnuje niebiaśpieka pieranosu hetych źjaŭ na terytoryju Rasii i Biełarusi, — zrabili maksimum dla spynieńnia hetaj vajny», — skazaŭ Łukašenka.
Krymnašyzm i Smalensk
Komsomolskaja pravda v Biełarusi: Vy adznačyli, što Biełaruś rychtujecca reahavać na pahrozy. Ale na jakija heta pahrozy: na Majdan ci na rasijski krymnašyzm?
Alaksandr Łukašenka doŭha razvažaje, što Biełaruś nie moža pretendavać na Smalensk, Bransk, Pskoŭ i Kalininhrad. Heta byŭ žart, kaža jon. Kali niechta zvarjaciaje paśla mianie, to narod jamu nie pazvolić tak dziejničać [zamachvacca na terytoryi].
Biełaruś pavinna mieć svaju zbroju
Što da patencyjnych pahroz, to «my pavinny mieć takuju armiju, jakaja moža nanieści nieprymalnuju škodu lubomu ahresaru».
«Frontu nie budzie. Nam patrebnyja mabilnyja padraździaleńni, jakija mohuć być siońnia ŭ Breście, a zaŭtra ŭ Viciebsku. Voś naša palityka i naša ideałohija ŭ hetym sensie. My ŭsio bolš pracujem, kab my mieli svaju zbroju. U nas siońnia zbroja rasijskaja, asnova tam. A nam treba mieć dobruju zbroju, kab budučy ahresar navat na pamyšlaŭ vajavać suprać Biełarusi. I my praz paru miesiacaŭ budziem ich mieć. Kali ŭ nas buduć ludzi i zbroja, nichto nie zachoča z nami vajavać. Prykład — Ukraina, kali armii nie było i jaje davodzicca stvarać na maršy».
«Majdanu ŭ Biełarusi nikoli nie budzie»
Što da Majdanu, to «Majdanu ŭ Biełarusi nikoli nie budzie». «Vajavać unutry Biełarusi nikomu nie budzie dazvolena».
Biełaruś — nie častka Ruskaha śvietu
Alaksandr Łukašenka nazvaŭ niezaležnaść krainy biezumoŭnaj i nieparušnaj.
«Što datyčyć rasijskaha «našyzmu», to supakojciesia. My, ruskija ludzi, budziem vajavać z ruskimi? Ja hetaha nie ŭjaŭlaju. Ja ŭvohule nie dapuskaju. Jak ruski čałaviek pryjdzie vajavać na svaju rodnuju ziamlu?»
«Jość asobnyja razumniki, jakija zajaŭlajuć, što Biełaruś heta, jak jany kažuć, častka Ruskaha śvietu i ci ledź nie Rasii. Zabudźciesia! Biełaruś — suvierennaja i niezaležnaja dziaržava», — padkreśliŭ Alaksandr Łukašenka 29 studzienia na pres-kanfierencyi ŭ Minsku.
«My prymusim luboha pavažać naš suvierenitet i niezaležnaść, chto razvažaje, što nie było, maŭlaŭ, takoj krainy. Nie było, a ciapier jość, i z hetym treba ličycca», — žaleznym hołasam pramoviŭ Łukašenka.
«Heta maja zadača. I jakaja b jana ni była ciažkaja, ja jaje vyrašu. Ja vykanaju svaju misiju. Čaho b mnie heta ni kaštavała», — skazaŭ jon.
«Tak što žyvicie spakojna, naradžajcie, hadujcie dziaciej. My dapamožam. Ja maju na ŭvazie hadavać dapamožam», - padsumavaŭ Łukašenka pad śmiech zały.
Pryvatyzacyja nie pryjarytet
«Biełarusy i rynok», Chadasoŭski: Pytańnie pra mahčymyja rynkavyja pieraŭtvareńni ŭ biełaruskaj ekanomicy, pryvatyzacyju.
Alaksandr Łukašenka krytykuje rasijskuju i ŭkrainskuju madeli libieralizacyi. Kaža, dla Biełarusi jana nieprymalnaja.
Pryvodzić prykład pryvatnaha «Amkadora», jakoje padtrymlivajuć na ŭzor MTZ i MAZa. Jon kvitnieje? — pytajecca jon. Nie.
«Pryvatyzacyja ničoha nie daść», — śćviardžaje jon.
«My čverć kałhasaŭ pryvatyzavali, ale mnohich viarnuli nazad».
«My 55 miljardaŭ dalaraŭ ukłali ŭ sielskuju haspadarku».
Taksama raskazvaje, što šmat valuty ŭkładziena ŭ achovu zdaroŭja.
Z hetymi inviestycyjami źviazvaje toj fakt, što zołatavalutnyja reziervy ŭ krainie nievialikija. Hrošy ŭkładvalisia ŭ raźvićcio, a nie ŭ stvareńnie reziervaŭ. Pryznaje, što adsutnaść reziervaŭ pryviała da devalvacyi.
Kali budzie krajniaja patreba, Rasija plačo padstavić
Nam nie chaciełasia b bolš brać kredyty, ale kali budzie krajniaja patreba, Rasija plačo padstavić, — adznačyŭ jon. «Mnie nie chaciełasia b zakredytoŭvacca i dalej», — adznačyŭ jon.
Alaksandr Łukašenka nie vyklučyŭ mahčymaści restrukturyzacyi zamiežnaj zapazyčanaści ŭ suviazi z tym, što «nam u hetym hodzie tre budzie vypłacić 4 miljardy dalaraŭ pa kredytach, u nastupnym hodzie — paŭtara».
«Za čas dyktatury Łukašenki kolkaść siadzielcaŭ u turmie pamienšała napałovu»
Pytańnie ad barysaŭskaj haziety «Adzinstva». Ci nie ličycie Vy, što prysud Malcavu z «Barysaŭdreva» trochi žorstki, što jaho zrabili krajnim?
«Ja bačyŭ krytyku ŭ hazietach, u tym liku i ŭ «Biełarusy i rynok». Ja papiaredžvaŭ, što nielha łamać los čałavieku».
Łukašenka pieravioŭ pytańnie na žorstkija złačynstvy, jon vystupaje za žorstkija pakarańni za ich.
«Za čas dyktatury Łukašenki kolkaść siadzielcaŭ u turmie pamienšała napałovu», — skazaŭ jon.
I ŭvohule, kaža, ja nie ŭmiešvajusia ŭ rašeńni sudoŭ. Ale daje zahad Kosincu viarnucca da spravy Malcava i pravieryć, ci spraviadliva jaho asudzili na try hady, raz tak prosiać jahonyja ziemlaki.
Škaduje pra vyvad jadziernaj zbroi
Pytańnie z Homiela: Pra jakija rašeńni jon škaduje?
Kaža, što nie rabiŭ pamyłak, akramia taho, što addaŭ jadziernuju zbroju.
«Šarachańniaŭ ad Rasii na Zachad nikoli nie budzie»
Pytańnie ad telekanała «Mir» pra mahčymuju pieraaryjentacyju Biełarusi z Rasii na Zachad.
Łukašenka adznačyŭ, što prablem u adnosinach z Rasijaj apošnim časam było bolš, čym u adnosinach z Zachadam.
«My ni na jotu nie adyšli ad šmatviektarnaści ŭ našaj zamiežnaj palitycy. Tak, na Uschodzie žyvuć rodnyja našy ludzi. Na Zachadzie — Polšča, Litva — my žyli ź imi kaliści ŭ adnoj dziaržavie, heta historyja. Kudy dzienieš toje, što siońnia Zachad — vysokatechnałahičny? Siońnia z Zachadam imknucca supracoŭničać usie, navat Rasieja hetaha choča. Dyk ci možna nas paprakać za toje, što my chočam spakojnaha žyćcia z Zachadam?» — zajaviŭ Alaksandr Łukašenka.
Jon padkreśliŭ, što hieapalityčnaje stanovišča Biełarusi dyktuje takuju zamiežnuju palityku krainy. «Adnoj z asnoŭnych pryčyn kanfliktu i strata častki terytoryi Ukrainaj źjaŭlajecca hetaja biazhłuzdaja hieapalityčnaja palityka. Dyk čaho nam jerapienicca? Kali my pačniom badacca i vajavać z našymi susiedziami, miru nie budzie. Prykład hetamu — Ukraina».
Jon padkreśliŭ, što Biełaruś budzie trymacca ŭ ramkach svaich zabaviazańniaŭ u sajuznaj dziaržavie.
«Ruski narod i Rasija dla mianie śviatoje. Ale i na Zachadzie ja zaraz vorahaŭ nie baču. Tamu niachaj nie dumajuć, što, dahadžajučy kamuśći, my budziem vajavać z Zachadam. Moža być, jašče i Rasii daviadziecca vykarystoŭvać hetuju narmalnuju pazicyju Biełarusi ŭ narmalizacyi peŭnych pracesaŭ», — skazaŭ Łukašenka.
«Dajcie fakty, dzie ja zaihryvaju z Zachadam. My nikoli nie padłaščvalisia pad Zachad, nie stajali na kaleniach, i heta maja pryncypovaja pazicyja. Łukašenka lubimym na Zachadzie nikoli nie budzie», — skazaŭ jon.
«Heta kamuści chočacca, kab nas prycisnuli, prydušyli, kab my na kaleniach stajali, i jak ni dziŭna, u apošni čas heta my čujem ad Rasii», — kinuŭ Łukašenka kamień u rasijski aharod.
«Nikoli na nas amierykancy nie davili. Naadvarot, my ź imi viadziom razmovu. Navały niama. My damovilisia pra mnohaje, my vykanali, jany vykanali. My pastavili pytańnie pra niejkija sankcyjnyja pradpryjemstvy, jany heta źniali. My damaŭlalisia, što my hetamu nie dajom ahłaski, my nie dajom».
U toj ža čas jon uzhadaŭ antybiełaruskuju kampaniju ŭ rasijskich ŚMI.
«Čamu vy mianie asabista i biełaruski narod źnievažajecie? — zapytaŭsia Łukašenka ŭ Pucina ŭ časie apošniaj sustrečy, raskazaŭ jon. — My ž damaŭlalisia, što paśla «Baćki-1, 2, 3, 4» asabistych źniavah nie pavinna być». «Voś kali na «Barysaŭ-arenie» stali skandavać, my pasadzili 37 čałaviek».
«Ja reahuju na ŭsie pytańni, nie dumajcie, što dyktatury mianie ŭžo źjeła».
«Nijakich palityčnych kansultacyjnych radaŭ my stvarać nie budziem»
Pytańnie ad «BDH-anłajn»: Ci płanujecca stvareńnie pry prezidencie niejkaj kansultacyjnaj rady? Łukašenka pytajecca, čamu hazieta nie vychodzić. Žurnalistka nie rašajecca adkazać, čamu.
Łukašenka doŭha razvažaje pra niepatrebnaść kansultacyjnych radaŭ. Paśla kaža: voś tolki ciapier uspomniŭ, što była takaja Rada pry Makieju. Nu, napeŭna, jana nie vielmi ciapier treba. «Nijakich palityčnych kansultacyjnych radaŭ my stvarać nie budziem», — kaža jon.
Pytańnie pra palitviaźniaŭ
Radyjo «Svaboda» prosić pra intervju. Łukašenka abiacaje. A pytacca budziecie pra palitviaźniaŭ, — viedaje napierad Łukašenka. — «Ci možna vypuścić ich, jak było zroblena ŭ 2008 hodzie?» — pytajecca Valer Kalinoŭski.
Łukašenka paŭtaraje, što «jość zakon, i jon dla ŭsich». «Statkievič — mienšaha kalibra čałaviek». «Hałoŭnaje dla mianie — navat nie napisańnie prośby ab pamiłavańni. Jon u kałonii, jon tam nie adzin. Inšyja 800 čałaviek taksama chočuć na svabodu. A čamu ja amnistuju Statkieviča, a nie Piatrova, Sidarava? Kab ja nie vyhladaŭ idyjotam pierad tymi ludźmi, jakija tam siadziać. Ci maju na heta prava i hrunt?»
«Valera, ja tabie svaimi dziećmi klanusia, jon dla mianie nie palityk! Jon pajšoŭ na hety šturm [Doma ŭrada]. Heta prajechali, heta było. Tamu nie treba kazać, što jon palitviazień».
«U nas niekatoryja byłyja siadzielcy žyvuć u Amierycy, Polščy. Ale žyvicie pa hetych zakonach. Jaki ž jon mnie kankurent? Jon ža mnie prajhraŭ na vybarach. Voś žyvy efir: «Płošča, Płošča, Płošča!» Ja voś nie pamiataju stvaralnaj prahramy».
«Hałoŭnaje — jak ja budu vyhladać pierad tymi ludźmi».
Žurnalist udakładniaje, što kandydaty buduć bajacca iści ŭ prezidenty na vybarach 2015 hoda, pakul siadzić Statkievič.
Łukašenka skančaje: «Pryvoźcie mnie podpisy inšych źniavolenych, i my jaho vypuścim».
Va Uschodniaje partniorstva ja nie rvusia, dadaŭ jon.
I palitviaźni — tolki adno z pytańniaŭ u adnosinach z Zachadam, adznačyŭ jon. «Zachad hladzić našmat dalej», — adznačaje jon.
«Ja ŭpeŭnieny, što ministr nie abiacaŭ pieravieści vykładańnie hieahrafii i historyi na biełaruskuju movu»
Pytańnie ad BiełaPANa pra biełaruskuju movu, kurs na jaje adradžeńnie i pretenzii ŭ Rasii nakont hetaha.
Hetaje pytańnie było vyrašana na refierendumie raz i nazaŭždy, adkazaŭ Łukašenka. U krainie dźvie dziaržaŭnyja movy.
«Ja padtrymlivaju biełaruskuju movu, bo heta toje, što adroźnivaje nas ad ruskaha čałavieka, ad rasijan, heta prykmieta nacyi. My ž biełarusy. Pobač z ruskaj movaj, jaki my vypakutavali, my majem biełaruskuju movu. My pavinny viedać biełaruskuju movu tak, jak ruskuju».
«Kali ŭ Rasii niechta napružvajecca», havorać pra «miakkuju siłu», to i my paspryjali «miakkaj biełarusizacyi».
«Vy viedali, z čaho pačalisia padziei va Ukrainie? Ź biazmozhłaj nacyjanalnaj palityki, pieradusim z movy. I ja rady, što tuju biazmozhłuju nacmienaŭskuju palityku… što mnie ŭdałosia skrucić hałavu toj nacyjanalistyčnaj palitycy, što była ŭ 90-ch, kali ruskaha čałavieka pasadzili na čamadany».
«My ŭžo prajechali hetaje pytańnie. Ja ŭpeŭnieny, što ministr nie abiacaŭ pieravieści vykładańnie hieahrafii i historyi na biełaruskuju movu».
«Chto jak choča i moža, toj tak i piša na ŭzrovień prezidenta». «Ja chaču, kab našy ludzi razmaŭlali na biełaruskaj movie, ale ja nie mahu travić i davić ludziej, i niachaj u Rasii nichto ŭ hetym płanie nie napružvajecca».
Łukašenka zaklikaŭ razmaŭlać u siemjach pa-biełarusku
«Voś vy žanatyja, Naścia? — zapytaŭsia jon u žurnalistki BiełaPAN, jakaja zadała pytańnie pra movu. — Vyjdziecie zamuž, razmaŭlajcie z mužam i dziećmi pa-biełarusku».
«Ja prasiŭ Papu, kab my bolš rychtavali ksiandzoŭ-biełarusaŭ»
Pytańnie ad Polskaha radyjo pra staŭleńnie da Katalickaha kaścioła i polskich ksiandzoŭ.
Vysoka aceńvaje Katalicki kaścioł. Što da ksiandzoŭ, «ja nie vielmi zadavoleny niekatorymi ź ich. Ja pra heta kazaŭ Papu. Ja pra heta kazaŭ Kazimiru Śviontku, heta čałaviek absalutna adkazny, i jon na heta reahavaŭ. I ja prasiŭ Papu, kab my bolš rychtavali ksiandzoŭ-biełarusaŭ. Ja i Hudžeroci pra heta kazaŭ».
JEAES zanadta małady, kab aceńvać
Pytańnie ad Biełaruskaha radyjo ab prablemach u JEAES — pieršaje pytańnie pa-biełarusku ad dziaržaŭnaha ŚMI.
Łukašenka iznoŭ kaža, što heta jašče maładoje ŭtvareńnie, nie vypracavałasia jašče psichałohija i praktyka. Ale mocna krytykuje Dankvierta.
Ruskaja, biełaruskaja mova na pres-kanfierencyi
Łukašenka pieršy raz za doŭhi čas ustaŭlaje słovy pa-biełarusku nie ŭ abraźlivym sensie. Ale słova «nabytak» nie ŭspomniŭ, nie lahło na jazyk. «Biełaruskaja mova — vialikaje naša dastajanije», skazaŭ.
A voś hazieta «Źviazda», Volha Miadźviedzieva, zadała pytańnie pa-rusku. Nu, dakacilisia…
Z Vavanam nie razmaŭlaŭ
Pytańnie ad «Rośsii siehodnia» pra zvanok prankiera Vavana.
Łukašenka doŭha i kručana kaža, što nie razmaŭlaŭ z Vavanam.
Rasii nie ŭdasca źmianić uładu ŭ Biełarusi. «Adzinaja padstava dla prezidenta nie iści na vybary — słaby rozum, chvaroba»
Pytańnie ad Jeŭraradyjo pra rasijskuju pahrozu i mahčymaha rasijskaha kandydata na vybarach, a taksama pra toje, kolki jašče źbirajecca Łukašenka zastavacca prezidentam.
«U 2050 hodzie nie paprosić, ja vam harantuju», — pažartavaŭ Łukašenka.
Alaksandr Łukašenka zajaviŭ, što Rasii nie ŭdasca źmianić uładu ŭ Biełarusi.
«Nachilić mianie niemahčyma. Usie zrazumieli, što značyli maje słovy ŭ Maskvie [ŭ śniežni 2014 hoda]. Mianie možna paviesić, zabić, ale nachilić, źmianić moj palityčny kurs niemahčyma».
«Novaha dla mianie ŭ prezidenctvie ŭžo nie budzie. Ja ŭžo ŭsio bačyŭ. Za 20 hadoŭ ja ŭžo ŭsio zrazumieŭ, usio pamacaŭ. Ja nie raźvivajusia. Ale sam ja syści nie maju prava. Kali ruchnie kraina? Ja palityk, ja pavinien zmahacca».
«Pałac Niezaležnaści — heta naš nacyjanalny apłot. Kiraŭniki dziaržavaŭ, pryjechaŭšy siudy, de-fakta pryznali niezaležnaść našaj dziaržavy».
«Adzinaja padstava dla prezidenta nie iści na vybary — słaby rozum, tupy rozum, chvaroba. Pra heta blizkija pavinny skazać».
«Vinavataja Rasija pa Ukrainie? Častkova».
Adznačaje, što zaŭvahi byłoha supracoŭnika Rasijskaha instytuta stratehičnych daśledavańniaŭ Sycina spraviadlivyja. «Tam jość debiły, niedavumki, jakija zarablajuć hrošy». «Ja heta baču, tamu nie chvalujciesia».
Zajaviŭ, što «nie choča zakryvać Jeŭraradyjo». Łukašuk adrazu paprasiŭ intervju i FM-častoty. Ale tut jamu adkazali, što «svabodnych častot niama».
Padniaŭ ź miesca Ananič, zapytaŭsia, ci «varožaje» ŚMI Jeŭraradyjo? Jana adkazała, što papiaredžańniaŭ Jeŭraradyjo nie maje, tady jak «Narodnaja vola» maje ich bolš za 25. «Ja zrazumieŭ, što Jeŭraradyjo siońnia mienšaje zło, čym Iosif Siaredzič», — žartavaŭ Łukašenka.
Tut pajšoŭ tradycyjny trolinh Iosifa Siaredziča.
«Ja bolš za ŭsio nie lublu hrošy»
«Ja bolš za ŭsio nie lublu hrošy. Jany stolki biedaŭ ludziam prynosiać», — skazaŭ Alaksandr Łukašenka ŭ adkaz na pytańnie, dzie trymaje aščadžeńni.
Pry hetym Alaksandr Łukašenka nie viedaŭ, raz na miesiac ci dva razy na miesiac atrymlivaje zarobak.
Pa jaho słovach, pałovu hrošaj jon kładzie na bankaŭski rachunak Koli, jaki jon zmoža źniać u 18 hadoŭ. A druhuju pałovu tracić na dziaciej, dabračynnaść i padarunki kaleham. I navat pazyčaje hrošy pry patrebach. A rešta lažyć u jaho ŭ druhoj źvierchu šufladcy.
Reakcyja na dziejnaść antybiełaruskich elemientaŭ
Pytańni ad «Našaj Nivy»: pieršaje pra stvareńnie biełaruskamoŭnaha dziciačaha kanała. Druhoje — jak śpiecsłužby reahujuć na dziejnaść antybiełaruskich jačejek u Biełarusi i rasijskich šavinistyčnych resursaŭ u internecie.
Na pieršaje pytańnie kankretnaha adkazu nie było dadziena. Słova ŭziaŭ Hienadź Davydźka, jaki staŭ stavić pretenzii «Našaj Nivie».
Pa druhim pytańni Alaksandr Łukašenka zajaviŭ, što reakcyja na dziejnaść antybiełaruskich elemientaŭ jość, i daručeńnie ŭ hetym pytańni, dadzienaje ŭ časie zvarotu da Nacyjanalnaha schodu, vykananaje.
Voś aŭdyjo pytańniaŭ «Našaj Nivy» i adkazaŭ:
Siaredzič zaklikaje da «kruhłaha stała»
Iosif Siaredzič abrynuŭsia z krytykaj na ministra Ananič. Raskazaŭ pra apošnija papiaredžańni — na jahonuju dumku, nieabhruntavanyja.
Jon zaściaroh ad pahrozaŭ niezaležnaści i zaklikaŭ da praviadzieńnia «kruhłaha stała».
Alaksandr Łukašenka zajaviŭ u adkaz, što hatovy da dyjałohu z hramadstvam, ale sam udzielničać u takich pracesach nie budzie.
U toj ža čas jon daŭ zrazumieć, što całkam razumieje pahrozy niezaležnaści i robić usio, kab kraina była zdolnaja na ich adkazać. Ale jon paŭtaryŭ, što samaje hałoŭnaje — nie «padstaŭlacca», jak Ukraina, nie razdražniać Rasii, umacoŭvać niezaležnaść treba biez rezkich krokaŭ, biez šarachańniaŭ.
Zarobki raści nie buduć
«Babrujskaje žyćcio» ŭdakładniaje pra metazhodnaść uklučeńnia drukarskaha stanka dla rostu zarobkaŭ, a taksama pra baraćbu z zarobkami ŭ kanviertach.
«Chočacie zarobak u dalarach ličyć - ličycie, ale ceny nie rastuć», — kaža Łukašenka. Jon nie baicca, što elektarat aburycca tym, što zarobki źmienšylisia.
Kali ŭklučyć stanok, Kałaŭr z Maciušeŭskim nie utrymajuć situacyju praz try miesiacy, tłumačyć Łukašenka.
Pra šeryja zarobki raskazvaje ministarka Ščotkina. Pryvodzić prykład, što kiraŭnik kampanii pa hruzapieravozkach mieŭ aficyjny zarobak pamieram 3 miljony rubloŭ.
Minski farmat pieramovaŭ
Pytańnie ad ukrainskaha infarmacyjnaha ahienctva UNIAN pra nievykanańnie minskich damoŭlenaściaŭ pamiž Ukrainaj i «DNR».
«Hałoŭnaje, kab na Danbasie byŭ mir», — pierakonvaje Łukašenka.
Ci treba šukać novuju placoŭku dla pieramovaŭ? «Možna i ŭ Astanie damaŭlacca, ale čym Minsk nie pasuje?» — nie razumieje jon.
Što treba zrabić, kab praduchilić abvastreńnie? «Žadańnie kiraŭnikoŭ dziaržaŭ, uciahnutych u kanflikt. Usio, — kaža Łukašenka. — Pierastupicie ambicyi, pryjazdžajcie ŭ Minsk, ja hatovy vam čaj nasić i ałoŭki».
Minsku brakuje łosku
«Minsk-Naviny» nahadvajuć pra novaha kiraŭnika Minskaha harvykankama Andreja Šorca. Čaho nie chapaje stalicy i jakija zadačy stajać pierad minčukami?
«Minsku brakuje łosku, — kaža Łukašenka. — Kab rajony, kvartały mieli zakončany vyhlad. Ja Šorcu paraiŭ: znajdzi dobrych architektaraŭ, kab jany pahladzieli i darabili toje, što treba. Vialikaja chiba Ładućki byŭ u vialikaj kolkaści pustych, zakinutych placovak».
Pra spynienuju budoŭlu raźviazki kala Nacyjanalnaj biblijateki. Łukašenka zapatrabavaŭ zamiest estakady zrabić niešta praściejšaje.
Plon baraćby z karupcyjaj
Pra baraćbu z karupcyjaj pytańnie zadaŭ Siarhiej Sacuk z «Ježiednievnika». Čamu pad vyhladam baraćby idzie stvareńnie ciapličnych umovaŭ dla karupcyjanieraŭ.
Łukašenka kaža, što palityčnaja zajava Sacuka, moža, i słušnaja, ale treba kazać pra kankretnyja fakty. Pačynajecca razmova pra «Barysaŭdreŭ» i drevaapracoŭčyja pradpryjemstvy.
Paŭła Jakuboviča ledź u turmu nie pasadzili za toje, što kuplaŭ papieru dla haziety za miažoj, raskazvaje Łukašenka. Jon tłumačyć, što ekspartazamiaščeńnie mebli akazałasia vyhadnym.
Sacuk aburajecca: navošta ŭ jahonaje vydańnie prychodzili śledčyja z pravierkaj, kali jon nie parušyŭ zakon. Prosić, kab ministry adkazvali na pytańni žurnalistaŭ.
Łukašenka dekłaruje padtrymku Sacuka. Maŭlaŭ, kali ministr nie razmaŭlaje z žurnalistam, to heta nie ministr. Ź dziasiatak takich možna vyhnać, kaža Łukašenka.
A hienieralny prakuror ciapier musić davać pastajannyja pres-kanfierencyi pa baraćbie z karupcyjaj.
Apytanka
