Amierykancy pabudavali ŭłasny «Mistral» — z samalotami i kanviertapłanami
Fłot ZŠA atrymaŭ univiersalny desantny karabiel, jaki stanie pačatkam cełaj sieryi novych karabloŭ hetaha kłasu, paviedamiŭ sajt public.navy.mil.
U adroźnieńnie ad desantnych «Mistralaŭ», jakija budujucca ŭ Francyi dla Rasii, karabiel «Amieryka» moža dziejničać nie tolki jak viertalotanosiec, ale i jak lohki avijanosiec dla kłasičnych samalotaŭ — takich, naprykład, jak najnoŭšy stełs-źniščalnik F-35B Lightning II.
Taksama pałubu karabla mohuć vykarystoŭvać kanviertapłany Bell V-22 Osprey — adzinyja sieryjnyja samaloty ŭ śviecie, jakija mohuć dziejničać i jak viertaloty. Takim čynam, jany mohuć desantavać vialikuju kolkaść piechacincaŭ na vialikija adlehłaści, ale pry hetym nie patrabujučy padrychtavanych placovak dla pasadki ci ŭźlotu.
Kanviertapłan Bell V-22 Osprey
Płanujecca, što zvyčajna karabiel budzie nieści 12 V-22 Osprey, 6 F-35B, 4 ciažkija transpartnyja viertaloty CH-53K, 7 udarnych viertalotaŭ (šturmavikoŭ) AH-1Z Viper ci UH-1Y Venom i 2 viertaloty MH-60 Seahawk dla ratavańnia ludziej u mory. Ź inšaha boku, «Amieryka» moža całkam vykarystoŭvacca jak avijanosiec i nieści 20 F-35B z 2 MH-60.
Vodaźmiaščeńnie karabla — 45700 ton, što bolš čym u dva razy pieravyšaje vodaźmiaščeńnie «Mistralaŭ», adpaviedna i karabiel prymaje značna bolšy kantynhient marskoj piachoty i techniki. U toj čas, kali rasiejskija karabli francuzskaj kanstrukcyi mohuć uziać maksimum 450 desantnikaŭ, amierykanski ŭniviersał prymaje na bort kala 1800 žaŭnieraŭ.
Značna lepšaje i zienitnaje ŭzbrajeńnie karabla — dalnabojnyja rakiety RIM-116 Rolling Airframe i RIM-162 Evolved SeaSparrow — u toj čas jak na «Mistralach» buduć stajać kompleksy z rakietami ad pieranasnych «Ihłaŭ».
Ci pačnie Francyja pieradavać «Mistrali» Rasii, vyrašycca ŭ kancy hetaha miesiaca. Pakul što Francyja dumaje pra mahčymuju admienu kantrakta z-za ŭdziełu RF u vajskovym kanflikcie z Ukrainaj i anieksii Kryma.
