Aniekdot ad Rumasa
Voś ŭmiejuć našy vysokapastaŭlenyja čynoŭniki paviesialić narod!
Kahadzie staršynia praŭleńnia «Banka raźvićcia» Siarhiej Rumas, jaki znachodzicca taksama ŭ ranhu vice-premjera i jaki ŭznačalvaje Biełaruskuju fiederacyju futboła, paśla pralota ŭ baraćbie za prava pravieści ŭ Minsku niekalki matčaŭ čempijanatu Jeŭropy-2020, jaki projdzie ŭ 13 krainach, suciešyŭ rasčaravanych zaŭziataraŭ.
- Jak nam dali zrazumieć, my ŭžo dakładna možam pretendavać na praviadzieńnie abo Supierkubku, albo finału Lihi Jeŭropy ŭ Minsku, - zajaviŭ Rumas, ścipła dadaŭšy: - Naturalna, paśla taho, jak budzie pabudavana arena.
Heta ničoha, što ciapier u stalicy Biełarusi niama nivodnaha stadyjona, na jakim možna było b pravieści choć by šarahovy jeŭrakubkavy matč. Rumas dumaje maštabna, zamachvajučysia adrazu na finał…
Praŭda, hetaj bajcy ŭžo nie tak mała hadoŭ. Pra toje, što Minsk na praciahu 4-ch hadoŭ (!) prymie finał Lihi Jeŭropy abo Lihi čempijonaŭ (!!!) havaryłasia jašče ŭ pieradvybarčaj prahramie Siarhieja Rumasa ŭ 2011 hodzie.
Praź niekalki miesiacaŭ pieršy namieśnik staršyni Biełaruskaj fiederacyi futboła Siarhiej Safarjan i zusim zajaviŭ: «Jość vielmi vialikaja vierahodnaść, što ŭ 2015 hodzie finał Lihi Jeŭropy projdzie ŭ Minsku na abnoŭlenym stadyjonie« Dynama ».
Chutka kazka kažacca, dy nie chutka sprava robicca. U 2013-m Rumas dezavujavaŭ ułasny pasył, paviedamiŭšy: «Naša zajaŭka na praviadzieńnie finału Lihi Jeŭropy 2016 nieaktualnaja. My stavim sabie novuju płanku — 2018 ».
Paśla va ŭjaŭleńni kiraŭnictva krainy stadyjon «Dynama» pieratvaryŭsia ŭ lohkaatletyčny, a nacyjanalnuju futbolnuju arenu vyrašana było pabudavać u inšym miescy. Ale, pa słovach Rumasa, da hetaha času niama navat prajektu. Šmat u čym mienavita tamu Minsk nie zdoleŭ trapić u čortaŭ tuzin haradoŭ, jakim davierana pryniać Jeŭra-2020.
Tak što, pryjdziecca zdavolvacca aniekdotami ad Rumasa pra finał Lihi Jeŭropy, jaki ŭžo ŭ nas u kišeni.
