Isłamisty adrezali hałavu jašče adnamu amierykanskamu žurnalistu
U internecie źjaviŭsia videaklip, na jakim, jak miarkujecca, pakazana abiezhałoŭlivańnie amierykanca Styviena Sotłafa, jaki znachodziŭsia ŭ zakładnikach u bajevikoŭ hrupoŭki «Isłamskaja dziaržava».
Žurnalist byŭ vykradzieny ŭ Siryi ŭ žniŭni minułaha hoda.
Na zapisie vidać, što pobač z žurnalistam, jaki na kaleniach, staić isłamist z nažom.
Bajavik u mascy pahražaje jašče adnamu zakładniku i patrabuje ad uradaŭ roznych krain razarvać aljans suprać isłamistaŭ.
U žniŭni bajevikami «Isłamskaj dziaržavy» byŭ abiezhałoŭleny inšy amierykanski reparcior — Džejms Foŭli.
Vykradzieny ŭ minułym hodzie Sotłaf taksama prysutničaje na videazapisie z zabojstvam Foŭli.
Bieły dom pakul nie moža paćvierdzić abo abvierhnuć sapraŭdnaść apošniaha videa.
Maci Foŭli Dyjana raniej zajaviła, što jaje syn addaŭ žyćcio, sprabujučy raspavieści śvietu pra pakuty siryjskaha naroda.
«Absalutna ahidny akt»
Premjer-ministr Brytanii Devid Kemieran užo nazvaŭ publikacyju zapisu zabojstva žurnalista «absalutna ahidnym aktam».
Lidary krain Zachadu zapatrabavali sklikać kanfierencyju, na jakoj jany źbirajucca vyrašyć, jak zmahacca z džychadystami z «Isłamskaj dziaržavy».
Styvienu Sotłafu byŭ 31 hod. Pa słovach siabroŭ, jon doŭha žyŭ u Jemienie i vydatna razmaŭlaŭ pa-arabsku.
Jaho repartažy ź Siryi, Jehipta i Livii publikavalisia ŭ takich vydańniach jak Time, Foreign Policy i Christian Science Monitor.