Łukašenka: U słavianskim śviecie ŭspychnuŭ pažar, biada ŭ ludziej
Alaksandr Łukašenka miarkuje, što na trahičnych padziejach va Ukrainie hrać ni ŭ jakim razie nielha.
Pra heta jon zajaviŭ 2 vieraśnia ŭ intervju viadomamu rasijskamu žurnalistu Siarhieju Brylovu — viadučamu prahramy «Viesti ŭ subotu» na telekanale «Rasija 1», paviedamlaje pres-słužba kiraŭnika dziaržavy.
Kiraŭnik dziaržavy adkazaŭ na kompleks pytańniaŭ, źviazanych z vynikami sustrečy prezidentaŭ dziaržaŭ — členaŭ Mytnaha sajuza, Ukrainy z udziełam vysokich pradstaŭnikoŭ ES, jakaja prajšła ŭ Minsku 26 žniŭnia.
U kantekście Minskaha samitu Łukašenka asobna akreśliŭ svajo bačańnie roli Biełarusi i jaje kiraŭnika ŭ arhanizacyi i praviadzieńni nazvanaj sustrečy, jakaja adbyłasia na fonie trahičnych padziej va Ukrainie.
«My naležym da adnaho słavianskamu śvietu. I ŭ hetym śviecie uspychnuŭ pažar. I ja heta chvaravita i emacyjna ŭsprymaju, — skazaŭ kiraŭnik dziaržavy.
— I kali mnie pačynajuć kazać pra toje, što voś niejkija dyvidendy… Hłupstva poŭnaje! Na hetym hrać ni ŭ jakim razie nielha! Biada ŭ ludziej. i chto my potym budziem, kali my z hetaha budziem dastavać niejkija haračyja hałavieški i vykarystoŭvać dla siabie?»
«Ja prosta zrabiŭ toje, čaho chacieli ŭsie. Parašenka chacieŭ u Minsku pravieści hety samit.
Jon u Rasiju b nie pajechaŭ, vy ž razumiejecie, - adznačyŭ Łukašenka. — Heta nie ja kryčaŭ: davajcie, pryjazdžajcie ŭ Minsk. Heta ideja była Parašenki. I biez Pucina hetaja sustreča tut by nie adbyłasia».
Alaksandr Łukašenka padzialiŭsia dumkaj pra šlachi chutčejšaha ŭrehulavańnia ŭnutryŭkrainskaj situacyi, a taksama raspavioŭ ab pradpryniatych biełaruskim bokam krokach pa źmiakčeńni niekatorych humanitarnych nastupstvaŭ padziej va Ukrainie.
Płanujecca, što padrabiaznaja viersija intervju vyjdzie ŭ efiry prahramy «Viesti ŭ subotu» na telekanale «Rasija 1» 6 vieraśnia.