Pjanuju aŭtałedzi spynili tolki streły pa kołach
Vypadak adbyŭsia ŭ paniadziełak u Chojnickim rajonie Homielskaj vobłaści.
A 21-j hadzinie ŭ v. Karčavoje narad darožna-patrulnaj słužby zaŭvažyŭ «Folksvahien Holf», u jakoha nie pracavali zadnija habarytnyja ahni. Inśpiektary DAI padali sihnał ab spynieńni aŭto. Adnak «Folksvahien» tolki dadaŭ hazu, praciahnuŭšy ruch u bok Chojnikaŭ. Supracoŭniki DAI pačali pieraśled. Nieadnarazova praz hučnaŭzmacnialnik imi ahučvałasia patrabavańnie spynieńnia. Tym nie mienš kiroŭca pa-raniejšamu sychodziŭ ad pieraśledu, nieŭzabavie vyjechaŭšy na pałasu sustrečnaha ruchu, čym staŭ stvarać realnuju pahrozu łabavoha sutyknieńnia.
Dla niedapuščeńnia ŭjezdu parušalnika ŭ horad było pryniata rašeńnie ab vykarystańni tabielnaj ahniastrelnaj zbroi.
Prycelnyja streły ŭ zadniaje levaje koła «Falksvahiena» paškodzili jaho. Nie dajazdžajučy 300 m da rajcentra aŭtamabil spyniŭsia.
Za rulom znachodziłasia žančyna, jakaja ŭ pretenzijnaj formie zajaviła: «Čaho vy za mnoj honiciesia?»
Jana kateharyčna admoviłasia vyjści z aŭtamabila. «Ałkatest» pakazaŭ, što ŭ kryvi ŭ kiroŭcy 2,2 pramile ałkaholu. Taksama vyśvietliłasia, što jašče ŭ 2012 hodzie žančyna była pazbaŭlena pravoŭ za kiravańnie aŭtamabilem u pjanym vyhladzie. Akramia taho, u jaje nie akazałasia dakumientaŭ na transpartny srodak.
U dačynieńni da «biespraŭnicy» składziena niekalki administracyjnych pratakołaŭ.
