Viasny niama, leta trapičnaje: jak źmianiŭsia klimat u Biełarusi za apošnija hady i što z hetym rabić
Sielskahaspadarčym arhanizacyjam Biełaruś treba źviarnuć uvahu na źmianieńnie klimatu i pieraaryjentavać svaju rabotu, ličyć načalnik słužby hidramietearałahičnych prahnozaŭ Respublikanskaha hidramieteacentra Dźmitryj Rabaŭ.
Na pres-kanfierencyi 20 žniŭnia jon adznačyŭ pavieličeńnie kolkaści zasuch, asabliva ŭ paŭdniova-ŭschodnich rehijonach krainy. «Sielskahaspadarčym arhanizacyjam nieabchodna źviarnuć na heta ŭvahu i vyroščvać tyja kultury, jakija mienš schilnyja da zasuch, — adznačyŭ Rabaŭ. — I ŭ suviazi z tym, što pavialičyłasia kolkaść zalevaŭ i padtapleńniaŭ, vysadžvać ich nie ŭ nizinnych miescach, a na bolš uzvyšanych. Na žal, ad hradu pakul ratavańnia niama».
Pavodle słoŭ sinoptyka, z 1989 hoda ŭ Biełarusi nazirajecca praciahły ciopły pieryjad, i, pavodle źviestak roznych vučonych, siaredniehadavaja tempieratura pavietra budzie raści i dalej, što, u svaju čarhu, pryvodzić da pavieličeńnia niebiaśpiečnych źjaŭ nadvorja.
Kali raniej u krainie byli vyznačany try ahraklimatyčnyja zony, to ciapier hetaje dzialeńnie mianiajecca. «Paŭnočnaja zona razburyłasia, i ŭ rajonie Paleśsia pačała farmiravacca novaja. Možna skazać tak, što klimat źmiaściŭsia z Ukrainy na poŭnač prykładna na 100 km», — adznačyŭ Rabaŭ.
Jon taksama padkreśliŭ, što apošnim časam u Biełarusi adbyłosia źmiaščeńnie siezonaŭ. «Pra anamalnyja zimy naohuł havaryć nie davodzicca. Samaja nizkaja tempieratura była ŭ nas u dalokim 1942 hodzie — minus 40°S. Ciapier karotkija chałodnyja pieryjady, kali tempieratura ŭ asnoŭnym minus 20—30°S, — heta zvyčajnaja sprava. Zimy stali bolš miakkimi i nie takija śniežnyja, kali nie ŭspaminać «Chaŭjer», — raskazaŭ sinoptyk.
Akramia taho, pavodle słoŭ Rabava, skaračajecca viasnovy siezon. «Kłasičnaj viasny, kali pryroda pavolna ažyvaje, užo niama ŭ apošnija hady — chucieńka ŭsio rastaje, chucieńka ŭsio raśćvitaje. Apošnimi hadami, pačynajučy z druhoj pałovy krasavika, užo staić u bolšaj stupieni červieńskaje nadvorje», — skazaŭ jon.
Leta, pavodle słoŭ sinoptyka, naadvarot, zrabiłasia bolš praciahłym. «U letni pieryjad apošnimi hadami prajaŭlajucca prykmiety trapičnaha klimatu, heta značyć, staić vielmi ciopłaje vilhotnaje nadvorje. Kali havaryć pra apadki, to za leta ich kolkaść nie vielmi pavialičyłasia, ale pavialičyłasia kolkaść mocnych liŭniaŭ», — raskazaŭ Rabaŭ.