Jak u Baranavičach rychtujuć da pracy kitajskija ciažkavozy
Novyja zvyšmahutnyja elektravozy Datunskaha zavoda ŭvodziać u ekspłuatacyju śpiecyjalisty z Kitaja.
Inžyniery i ślesary Datunskaha łakamatyŭnaha zavoda buduć pracavać u nas na praciahu troch hadoŭ, pakul elektravozy absłuhoŭvajucca pa harantyi.
U łakamatyŭnym depo Baranavičaŭ «IP» raspaviali, što
novy elektravoz chutčej «hramadzianin śvietu», čym kitajec. Hałoŭnyja vuzły zroblenyja znakamitymi firmami — kanadskaj Bombardier, niamieckaj Knorr-Bremze i francuzskaj Alstom. Kitajskija kampanienty — heta hałoŭnym čynam kabina i kuzaŭ.
Kitajski hruzavy łakamatyŭ BKH-1 na 10 km/h chutčejšy i ŭ paŭtara raza bolš mahutny, čym asnoŭny elektravoz našych mahistralaŭ VŁ-80c.
Važyć dvuchsiekcyjny elektravoz 200 ton, ahulnaja mahutnaść siłavoj ustanoŭki — 9600 kiłavat. Heta mahutnaść 130 ruchavikoŭ siaredniaj lehkavuški. Maksimalnaja kanstruktyŭnaja chutkaść elektravoza — 120 km/h.
Zamiest žaleznych ručak i ryčahoŭ ŭ kabinie — džojściki. Kresła mašynista nahadvaje ofisnaje.
Na elektravozie ŭstalavany vializny bartavy kampjutar, infarmacyja ź jakoha vyvodzicca na sensarny ekran.
Pra kamfort ekipaža pakłapacilisia dobra: na borcie jość nie tolki bijaprybiralnia, ale i chaładzilnik, elektračajnik, mikrachvaloŭka.
U 2012 šeść elektravozaŭ BKH-1 užo prybyli ŭ łakamatyŭnaje depo Baranavičaŭ. Dva ź ich užo vykarystoŭvajucca. Usiaho pavodle padpisanaha kantraktu budzie pastaŭlena 12 takich łakamatyvaŭ, a da 2015 hoda ich pavinna stać 30. Akramia taho, na praciahu 2011—2015 hh čyhunki płanuje kupić 24 pasažyrskich elektravozaŭ i 29 elektraciahnikoŭ.