Вайсковым аташэ ЗША ў Беларусі стаў афіцэр з амерыканскай амбасады ў Кіеве
Палкоўнік Майкл Вандэвельдэ стане ваенным аташэ пры амбасадзе ЗША ў Беларусі па сумяшчальніцтве. Цяпер ён таксама займае пасаду сухапутнага аташэ пры амбасадзе ЗША ва Украіне. Сёння ён атрымаў акрэдытацыю пры Міністэрстве абароны Беларусі, паведаміла прэс-служба ведамства.
Фота прэс-службы амбасады ЗША.
— У межах знаходжання ў Рэспубліцы Беларусь 9 жніўня палкоўнік Майкл Вандэвельдэ наведае міратворчую роту 103-й асобнай гвардзейскай паветрана-дэсантнай брыгады падчас палявога выхаду, — адзначылі ў Мінабароны.
Амбасада ЗША ў сваю чаргу паведамляе, што ў гэтым месяцы беларускі падпалкоўнік Андрэй Мішута будзе акрэдытаваны ў якасці ваеннага аташэ па сумяшчальніцтву ў Вашынгтоне.
— Акрэдытацыя палкоўніка Вандэвельдэ ўяўляе сабой наступны крок па аднаўленні ваеннага супрацоўніцтва паміж Рэспублікай Беларусь і ЗША. Магчымасць узаемнай акрэдытацыі ваенных аташэ абмяркоўвалася ў сакавіку гэтага года падчас візіту ў Мінск намесніка памочніка міністра абароны ЗША Майкла Карпентэра, — адзначылі ў амбасадзе.
Майкл Вальдэвельдэ (у цэнтры) гутарыць з беларускім ваенным лётчыкам у адстаўцы, бацьку якога амерыканскія салдаты вызвалілі з лагера ваеннапалонных у Германіі ў гады Другой Сусветнай вайны. 21 чэрвеня, Мінск. Фота usafe.af.mil.
Ваенны аташэ ўжо быў у Беларусі да сённяшняй сустрэчы ў Мінабароны. 20 чэрвеня ён наведаў канцэрт джаз-бэнд аркестра ВПС ЗША ў Еўропе для ветэранаў Вялікай Айчыннай вайны, воінаў-інтэрнацыяналістаў і ліквідатараў аварыі на ЧАЭС у мінскім Доме дружбы.
А 21 чэрвеня ўдзельнічаў у прыёме амерыканскай дыпмісіі з нагоды Дня незалежнасці ЗША.
Былы павераны ў справах ЗША Скот Роланд, яго жонка і палкоўнік Вальдэвельдэ вітаюць гасцей на чэрвеньскім прыёме ў Мінску. Фота прэс-службы амбасады ЗША.
Вядома, што ва Украіне Майкл Вальдэвельдэ ўдзельнічаў у абмеркаванні праграмы ваеннай дапамогі па стварэнні 1-й брыгады лёгкай пяхоты Нацгвардыі па стандартах НАТО.
За выезды ў зону АТА і арганізацыю трэнінгаў для ўкраінскіх ваенных дабрачынны «Фонд оборони країни» ўзнагародзіў амерыканскага палкоўніка аднайменным ордэнам «За оборону країни».
