Vajskovym ataše ZŠA ŭ Biełarusi staŭ aficer z amierykanskaj ambasady ŭ Kijevie
Pałkoŭnik Majkł Vandevielde stanie vajennym ataše pry ambasadzie ZŠA ŭ Biełarusi pa sumiaščalnictvie. Ciapier jon taksama zajmaje pasadu suchaputnaha ataše pry ambasadzie ZŠA va Ukrainie. Siońnia jon atrymaŭ akredytacyju pry Ministerstvie abarony Biełarusi, paviedamiła pres-słužba viedamstva.
Fota pres-słužby ambasady ZŠA.
— U miežach znachodžańnia ŭ Respublicy Biełaruś 9 žniŭnia pałkoŭnik Majkł Vandevielde naviedaje miratvorčuju rotu 103-j asobnaj hvardziejskaj pavietrana-desantnaj bryhady padčas palavoha vychadu, — adznačyli ŭ Minabarony.
Ambasada ZŠA ŭ svaju čarhu paviedamlaje, što ŭ hetym miesiacy biełaruski padpałkoŭnik Andrej Mišuta budzie akredytavany ŭ jakaści vajennaha ataše pa sumiaščalnictvu ŭ Vašynhtonie.
— Akredytacyja pałkoŭnika Vandevielde ŭjaŭlaje saboj nastupny krok pa adnaŭleńni vajennaha supracoŭnictva pamiž Respublikaj Biełaruś i ZŠA. Mahčymaść uzajemnaj akredytacyi vajennych ataše abmiarkoŭvałasia ŭ sakaviku hetaha hoda padčas vizitu ŭ Minsk namieśnika pamočnika ministra abarony ZŠA Majkła Karpientera, — adznačyli ŭ ambasadzie.
Majkł Valdevielde (u centry) hutaryć ź biełaruskim vajennym lotčykam u adstaŭcy, baćku jakoha amierykanskija sałdaty vyzvalili z łahiera vajennapałonnych u Hiermanii ŭ hady Druhoj Suśvietnaj vajny. 21 červienia, Minsk. Fota usafe.af.mil.
Vajenny ataše ŭžo byŭ u Biełarusi da siońniašniaj sustrečy ŭ Minabarony. 20 červienia jon naviedaŭ kancert džaz-bend arkiestra VPS ZŠA ŭ Jeŭropie dla vieteranaŭ Vialikaj Ajčynnaj vajny, voinaŭ-internacyjanalistaŭ i likvidataraŭ avaryi na ČAES u minskim Domie družby.
A 21 červienia ŭdzielničaŭ u pryjomie amierykanskaj dypmisii z nahody Dnia niezaležnaści ZŠA.
Były pavierany ŭ spravach ZŠA Skot Rołand, jaho žonka i pałkoŭnik Valdevielde vitajuć haściej na červieńskim pryjomie ŭ Minsku. Fota pres-słužby ambasady ZŠA.
Viadoma, što va Ukrainie Majkł Valdevielde ŭdzielničaŭ u abmierkavańni prahramy vajennaj dapamohi pa stvareńni 1-j bryhady lohkaj piachoty Nachvardyi pa standartach NATO.
Za vyjezdy ŭ zonu ATA i arhanizacyju treninhaŭ dla ŭkrainskich vajennych dabračynny «Fond oboroni krajini» ŭznaharodziŭ amierykanskaha pałkoŭnika adnajmiennym ordenam «Za oboronu krajini».