Наш Андрэй Арлоўскі будзе біцца з зоркай UFC Алістарам Аверымам. Сем фактаў напярэдадні бою
Сёння ў галандскім Ратэрдаме пачнецца турнір па змяшаных адзінаборствах UFC Fight Night 87.
Галоўны бой вечара — сустрэча топавых байцоў цяжкай катэгорыі Андрэя Арлоўскага і Алістара Аверыма.
Пераможца разглядаецца як наступны кандыдат на чэмпіёнскі пояс.
Абодва байцы практыкуюць ударную тэхніку, таму бой мусіць быць відовішчны.
«Наша Ніва» прыводзіць некалькі фактаў пра сустрэчу:
Так выглядае супернік беларуса
— Андрэй Арлоўскі сёння займае 5 месца ў рэйтынгу байцоў UFC у цяжкай вазе, таксама ў свае 37 гадоў ён самы ўзроставы баец на турніры. Ягоны супернік маладзейшы на два гады і трэці ў рэйтынгу.
— Для Аверыма бой у Ротэрдаме можна лічыць хатнім — Алістар нарадзіўся ў Нідэрландах, абсалютная большасць тамтэйшых фанатаў будзе падтрымліваць менавіта яго.
— Аверым добра «разагнаўся» перад боем з Арлоўскім, маючы тры перамогі запар — ён не саступаў у баях са снежня 2014-га! Беларус жа свой папярэдні бой прайграў менш як за хвіліну.
— Абодва байцы належаць да аднаго клуба і трэніруюцца ў адным месцы. Але гэта не робіць іх сябрамі — Арлоўскі неаднойчы абвінавачваў Аверыма ў тым, што ён ужывае брудныя прыёмы і імкнецца траўмаваць сваіх спарынг-партнёраў.
Аднойчы Арлоўскаму нават ледзь не давялося адмяняць свой бой з «Бігфутам» праз падазрэнні, што Аверым зламаў яму рэбры ў трэніровачным баі. Але асноўны трэнер клубу, дзе займаюцца байцы, Грэг Джэксан будзе прысутнічаць на сустрэчы ў кутку Андрэя.
— У Аверыма самая высокая ў гісторыі прамоўшна дакладнасць акцэнтаваных удараў — яны трапляюць па суперніку ў 74,5% выпадкаў. Але і Арлоўскі на ўзроўні — ён прымае ў абарону 66,3% акцэнтаваных удараў. А гэта таксама найлепшы паказчык ва UFC (у цяжкай вазе).
— Арлоўскі выйграў 9 сустрэч у цяжкай вазе накаўтам (альбо тэхнічным накаўтам). Лепшай статыстыкі сярод «цяжаў» не мае ніхто. Аверым жа ж антырэкардсмен — у сваёй кар'еры ён 9 разоў саступаў накаўтам (альбо тэхнічным накаўтам).
— Што Арлоўскі, што Аверым — вельмі нестабільныя байцы. У іхніх кар'ерах спалучаліся яскравыя трыумфы і абсалютна нечаканыя паразы. Абодва яны вельмі кепска трымаюць удар, што робіць гэтую сустрэчу ў цяжкай вазе непрадказальнай.