Naš Andrej Arłoŭski budzie bicca z zorkaj UFC Alistaram Avierymam. Siem faktaŭ napiaredadni boju
Siońnia ŭ hałandskim Raterdamie pačniecca turnir pa źmiašanych adzinaborstvach UFC Fight Night 87.
Hałoŭny boj viečara — sustreča topavych bajcoŭ ciažkaj katehoryi Andreja Arłoŭskaha i Alistara Avieryma.
Pieramožca razhladajecca jak nastupny kandydat na čempijonski pojas.
Abodva bajcy praktykujuć udarnuju techniku, tamu boj musić być vidoviščny.
«Naša Niva» pryvodzić niekalki faktaŭ pra sustreču:
Tak vyhladaje supiernik biełarusa
— Andrej Arłoŭski siońnia zajmaje 5 miesca ŭ rejtynhu bajcoŭ UFC u ciažkaj vazie, taksama ŭ svaje 37 hadoŭ jon samy ŭzrostavy bajec na turniry. Jahony supiernik maładziejšy na dva hady i treci ŭ rejtynhu.
— Dla Avieryma boj u Roterdamie možna ličyć chatnim — Alistar naradziŭsia ŭ Niderłandach, absalutnaja bolšaść tamtejšych fanataŭ budzie padtrymlivać mienavita jaho.
— Avierym dobra «razahnaŭsia» pierad bojem z Arłoŭskim, majučy try pieramohi zapar — jon nie sastupaŭ u bajach sa śniežnia 2014-ha! Biełarus ža svoj papiaredni boj prajhraŭ mienš jak za chvilinu.
— Abodva bajcy naležać da adnaho kłuba i trenirujucca ŭ adnym miescy. Ale heta nie robić ich siabrami — Arłoŭski nieadnojčy abvinavačvaŭ Avieryma ŭ tym, što jon užyvaje brudnyja pryjomy i imkniecca traŭmavać svaich sparynh-partnioraŭ.
Adnojčy Arłoŭskamu navat ledź nie daviałosia admianiać svoj boj z «Bihfutam» praz padazreńni, što Avierym złamaŭ jamu rebry ŭ trenirovačnym bai. Ale asnoŭny trenier kłubu, dzie zajmajucca bajcy, Hreh Džeksan budzie prysutničać na sustrečy ŭ kutku Andreja.
— U Avieryma samaja vysokaja ŭ historyi pramoŭšna dakładnaść akcentavanych udaraŭ — jany traplajuć pa supierniku ŭ 74,5% vypadkaŭ. Ale i Arłoŭski na ŭzroŭni — jon prymaje ŭ abaronu 66,3% akcentavanych udaraŭ. A heta taksama najlepšy pakazčyk va UFC (u ciažkaj vazie).
— Arłoŭski vyjhraŭ 9 sustreč u ciažkaj vazie nakaŭtam (albo techničnym nakaŭtam). Lepšaj statystyki siarod «ciažaŭ» nie maje nichto. Avierym ža ž antyrekardsmien — u svajoj karjery jon 9 razoŭ sastupaŭ nakaŭtam (albo techničnym nakaŭtam).
— Što Arłoŭski, što Avierym — vielmi niestabilnyja bajcy. U ichnich karjerach spałučalisia jaskravyja tryumfy i absalutna niečakanyja parazy. Abodva jany vielmi kiepska trymajuć udar, što robić hetuju sustreču ŭ ciažkaj vazie niepradkazalnaj.
