Навучэнка мінскага каледжа падазраецца ў махлярстве ў інтэрнэце
Пухавіцкім раённым аддзелам Следчага камітэта расследуецца крымінальная справа ў дачыненні да навучэнкі аднаго з мінскіх каледжаў, якая падазраецца ў махлярстве ў інтэрнэце.
Яе паведаміла афіцыйны прадстаўнік упраўлення СК па Мінскай вобласці Таццяна Беланог, крымінальная справа распачата па заявах грамадзян, якія, заказаўшы сабе адзенне ў адной з груп сацыяльнай сеткі і пералічыўшы грошы ў якасці перадаплаты, тавар так і не атрымалі, грошы таксама ім не вернутыя.
У ходзе папярэдняга расследавання ўстаноўлена, што пацярпелыя сталі ахвярамі махлярскіх дзеянняў жыхаркі Пухавіцкага раёна 1997 года нараджэння. З верасня 2014 года па ліпень 2015 года дзяўчына размяшчала ў сацыяльных сетках аб'явы аб продажы рэчаў. У прапанаваным асартыменце ў асноўным былі жаночыя сукенкі, абутак, дзіцячае адзенне. Пакупнікоў яна прасіла зрабіць 100-працэнтную перадаплату на сваю банкаўскую карту або паштовым пераводам. Абяцала адправіць пакупку па названым адрасе. Атрымаўшы грошы, падазроная свае абавязацельствы не выконвала, а паведамляла аб розных прычынах затрымкі тавару.
Такім чынам дзяўчына ашукала каля 30 чалавек, якія жывуць у розных рэгіёнах вобласці. Пацярпелыя пералічылі за нібыта набытую пакупку розныя грашовыя сумы — ад 200 тыс. да 2 млн. рублёў.
У межах справы, распачатай па ч. 2 арт. 209 КК (махлярства, учыненае паўторна), устанаўліваецца ўсё кола пацярпелых і памер прычыненага ўрону. Следствам вывучаецца канфіскаваная камп'ютарная тэхніка, прызначаны даследаванні, у тым ліку камп'ютарна-тэхнічная экспертыза.