У Бабруйску сямігадовая дзяўчынка выпала з акна 5-га паверха
Выпадак здарыўся 9 лістапада ў 16:20 у доме на вуліцы Гогаля ў мікрараёне «Заходні».
Як паведаміла афіцыйны прадстаўнік Следчага камітэта РБ па Магілёўскай вобласці Аксана Салянюк, маленькая бабруйчанка разам з мамай вярталася дадому. Па дарозе жанчына вырашыла зайсці ў краму, а дачцы ўручыла ключы і адправіла дадому. Дзяўчынка зайшла ў кватэру, зачыніла дзверы, але адкрыць іх, каб сустрэць маму, не змагла.
«Высветлілася, што ў дзвярах захрас кілімок. Гэта пацвердзіў і старэйшы брат дзяўчынкі, які ў гэты час вярнуўся дадому і таксама не змог трапіць у кватэру», — адзначыла Аксана Салянюк.
Паводле яе слоў, Крысціна спалохалася і вырашыла папярэдзіць маму аб тым, што здарылася, адкрыла акно, каб крыкнуць, і, мяркуючы па ўсім, не ўтрымалася на падваконніку. Ужо праз неколько секунд дзіця апынулася на зялёным газоне.
З месца падзення дзяўчынка была аператыўна дастаўлена ў рэанімацыю Бабруйскай цэнтральнай бальніцы.
Як паведаміла намеснік галоўнага доктара БЦБ Наталля Кушнярова, у пацярпелай дыягнаставана мноства траўмаў. «Дзяўчынка знаходзіцца ў свядомасці, аднак яе стан мы ацэньваем як стабільна цяжкі», — падкрэсліла Наталля Іванаўна.
Абставіны здарэння высвятляюцца.
Гэта ўжо другі няшчасны выпадак з непаўналетнімі за апошні месяц у Бабруйску. 19 кастрычніка ў ванне патанула дзевяцімесячнае дзіця, пакінутае ненадоўга без нагляду.