У Глыбокім да 1 Мая паставілі «ідэалагічна правільны» помнік
Калі пачынаць загінаць пальцы і лічыць, то ў Глыбокім, аказваецца, са два дзясяткі помнікаў і скульптурных кампазіцый. Засталося яшчэ два з трох некалі помнікаў Леніну, ёсць Дзяржынскі (насупраць калоніі), Езус і самарыцянка, помнік барону Мюнхгаўзену, Алея Славы…
Да 1 Мая Глыбокае папоўнілася яшчэ адной скульптурай — рабочага з сярпом і молатам. Усталявалі яе насупраць хлебазавода, а можна сказаць, што і насупраць малочна-кансервавага камбіната. То бок паміж двума прадпрыемствамі. Скульптуру прыцягнулі з бліжэйшай вёскі Зарубіна, дзе яна стаяла насупраць канторы калгаса.
Калгас даўно зліквідавалі, то й скульптура сталася вёсцы не патрэбнай.
Прычым тут ідэалогія? Проста, такія «помнікі» ва Украіне, ды і ў краінах былога сацлагеру, на заканадаўчым узроўні, альбо даўно дэмантавалі ці цяпер дэмантуюць. А ў нас яшчэ пакуль ставяць!
