У Беларусі будзе створаны інфармацыйны цэнтр па атамнай энергіі
Сёлета ў Беларусі будзе створаны інфармацыйны цэнтр па атамнай энергіі, паведаміў на прэс-канферэнцыі 8 верасня ў Мінску дырэктар Рэспубліканскага цэнтра інавацыйнай і тэхнічнай творчасці (РЦІТТ) Сяргей Сачко.
«Работы распачатыя. Мы плануем адкрыццё ў канцы кастрычніка — лістападзе», — дадаў ён.
Паводле слоў Сачко, цэнтр ствараецца на базе РЦІТТ «для таго, каб насельніцтва, навучэнцы маглі больш даведацца пра атамную энергію, пра мірны атам». «Паколькі ў нас будуецца атамная электрастанцыя, у супрацоўніцтве з Расійскай Федэрацыяй тут і ствараецца гэты цэнтр», — сказаў ён.
Цэнтр будзе працаваць на некамерцыйнай аснове і ствараецца з мэтай павышэння якасці навуковай, тэхнічнай, інавацыйнай і адукацыйнай дзейнасці не толькі ў галіне атамнай энергетыкі, але і прыродазнаўчых навук у цэлым, адзначыў Сачко. На базе цэнтра будуць праводзіцца адукацыйныя мерапрыемствы, навукова-тэхнічныя канферэнцыі, лекцыі, у якіх змогуць удзельнічаць навучэнцы сярэдніх устаноў адукацыі, студэнты, педагогі.
