Міністэрства аховы здароўя мае намер «разгрузіць» школьныя заплечнікі і скараціць продаж сасісак у цесце
Гэта прадугледжана пастановай Міністэрства аховы здароўя №63 ад 29 ліпеня гэтага года, паведамляе БелТА.
Паводле дакумента, маса штодзённага камплекта падручнікаў з пісьмовымі прыладамі (без масы ранца ці заплечніка) павінна быць зніжана для навучэнцаў III—IV класаў — да 2 кг, V—VI класаў — 2,5 кг, VII—VIII класаў — 3 кг, IX—XI класаў — 3,5 кг. Пры гэтым маса пустога заплечніка для навучэнцаў малодшых класаў павінна складаць не больш за 700 г, для сярэдніх і старэйшых класаў — да 1 кг.
«Калі сёлета быў праведзены кантроль масы таго, што прыносяць у школу, аказалася, што маса партфеляў у шэрагу выпадкаў не адказвала патрабаванням — часта з-за наяўнасці дадатковых прадметаў, не звязаных з навучальным працэсам», — распавялі ў Рэспубліканскім цэнтры гігіены, эпідэміялогіі і грамадскага здароўя.
Вагу школьнага партфеля мусяць кантраляваць як бацькі, так і настаўнікі.
Акрамя таго, у школах прапануецца арганізаваць дадатковыя месцы, каб дзіця магло пакідаць там такія прадметы, як набор фарбаў, альбом, школьную форму.
Дакумент прадугледжвае выкарыстанне ва ўстановах спецыяльнай адукацыі фасаванай ў ёмістасці негазаванай пітной вады прамысловай вытворчасці, або вады з цэнтралізаванай водаправоднай сістэмы пасля яе ачышчэння праз лакальныя фільтры прамысловай вытворчасці, або кіпячонай вады. Пры гэтым кіпячоная вада павінна захоўвацца ў закрытых ёмістасцях з водаразборным кранам або ў графінах на працягу не больш як 4 гадзін.
З мэтай зрабіць рацыён больш разнастайным у буфеце абмяжоўваецца рэалізацыя некаторых высокакаларыйных мучных страў (піцы, смажанак, сасісак у цесце). Іх можна будзе гатаваць не больш як два разы на тыдзень.
Павінны быць забяспечаныя ўмовы для падагрэву кулінарных вырабаў. У якасці «агульнаўмацальнага прадукту» ў асартымент буфетаў уведзены гематаген, але не часцей як два разы за вучэбны тыдзень.
Прадукты з вострым смакам (хрэн, перац чырвоны і чорны, гарчыца, сталовы воцат) таксама будуць пад забаронай.
Востры перац у рэцэптурах замяняецца пятрушкай, сельдэрэем, кропам, цыбуляй, часныком, карыцай, а сталовы воцат — цытрынавай кіслатой.
