Nacbank: Aryjenciry pa kursie rubla na 2013 hod nie ŭstanoŭleny, ale rezka źmianiacca jon nie pavinien

U vieraśni Łukašenka zaćvierdziŭ važniejšyja paramietry prahnozu sacyjalna-ekanamičnaha raźvićcia. Rost VUP pavinien skłaści 8,5%, uzrovień hadavoj inflacyi — 12%. U intervju haziecie «Respublika» namieśnik staršyni praŭleńnia Nacyjanalnaha banka Biełarusi Juryj Ałymaŭ vykazaŭ upeŭnienaść u dasiahnieńni metaŭ, a taksama raskazaŭ, što budzie z abmiennym kursam rubla.

— Na 2013 hod, jak i sioleta, metavyja aryjenciry pa abmiennym kursie nie ŭstanoŭlenyja, — skazaŭ Ałymaŭ.

— Abmienny kurs budzie farmiravacca zychodziačy z popytu i prapanovy zamiežnaj valuty na ŭnutranym rynku. Kupla i prodaž zamiežnaj valuty Nacbankam buduć pravodzicca ŭ abmiežavanym abjomie tolki ŭ metach zhładžvańnia karotkaterminovych vahańniaŭ abmiennaha kursu.

Ale heta nie značyć, što dynamika abmiennaha kursu budzie nasić niekiravany charaktar. Nie varta čakać rezkaj źmieny kursu.

U nastupnym hodzie Biełarusi čakajuć značnyja vypłaty pa źniešnim abaviazku. Jak heta adabjecca na kursie? Ałymaŭ nie bačyć padstavy dla zaniepakojenaści.

— Vypłaty pa źniešnim abaviazku na abmiennym kursie biełaruskaha rubla nie adabjucca. U nas nazapašana dastatkova valutnych resursaŭ dla biezumoŭnaha vykanańnia źniešnich abaviazacielstvaŭ pierad kredytorami. Akramia taho, razam z vypłatami ŭ nastupnym hodzie zapłanavany taksama valutnyja pastupleńni.

Čakajecca atrymańnie čarhovych tranšaŭ kredytu ad Antykryzisnaha fondu JeŭrAzES. Viadziecca praca pa pryciahnieńni ŭ krainu zamiežnych inviestycyj. Z ulikam zbałansavanaści źniešniaha handlu i ŭnutranaha valutnaha rynku heta dazvolić nie tolki paźbiehnuć skaračeńnia, ale i naraścić zołatavalutnyja reziervy. Pastaŭlena zadača pa ich pavieličeńni pa vynikach 2013 na $ 0,3–0,7 młrd.

dengi.onliner.by

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH