ES praciahnuŭ sankcyi ŭ dačynieńni da aficyjnaha Minska da 31 kastryčnika 2013 hoda
Jeŭrasajuz pradoŭžyŭ sankcyi ŭ dačynieńni da aficyjnaha Minska da 31 kastryčnika 2013 hoda. Adpaviednaje rašeńnie pryniata 15 kastryčnika na pasiadžeńni rady ministraŭ zamiežnych spraŭ krain ES u Luksiemburhu.
«Uličvajučy, što nie ŭsie palitźniavolenyja byli vyzvaleny i nichto z vyzvalenych (palitviaźniaŭ) nie byŭ reabilitavany, a situacyja z pavažańniem pravoŭ čałavieka, viaršenstva zakonu i demakratyčnych pryncypaŭ nie palepšyłasia, Rada praciahnie dziejańnie abmiežavalnych mier da 31 kastryčnika 2013 hoda», — kazałasia ŭ kamientaryi da paradku dnia.
Jeŭrasajuz maje namier pieryjadyčna pierahladać abmiežavalnyja miery ŭ dačynieńni da Biełarusi ŭ zaležnaści ad taho, jak budzie raźvivacca situacyja ŭ krainie.U paviedamleńni nahadvajecca, što zaraz 243 biełaruskim čynoŭnikam, u tym liku kiraŭniku dziaržavy Alaksandru Łukašenku, zabaronieny ŭjezd na terytoryju krain ES.
«Jeŭrasajuz praciahnie patrabavać, kab ŭsie palitźniavolenyja byli vyzvalenyja i reabilitavanyja, — padkreślivajecca ŭ paviedamleńni. — Palityka ES u dačynieńni da Biełarusi ŭ lubym vypadku nie abmiažoŭvajecca sankcyjami, ale taksama prajaŭlajecca ŭ padtrymcy hramadzianskaj supolnaści i niezaležnych ŚMI».
