Ihnor-2012: vyniki imitacyjnaj palityki

Nie vyklučeńnie i apošniaja kampanija pa pryznačeńni ŭ Pałatu pradstaŭnikoŭ čynoŭnikaŭ i inšych funkcyjanieraŭ, što adpracavali «dziaržavie» vieraj i praŭdaj. U vyniku 109 deputataŭ (sa 110) abranyja ŭžo ŭ pieršym tury, i tolki karupcyjny skandał u Homieli nie dazvoliŭ zapoŭnić jašče adno miesca ŭ tak zvanym parłamiencie.

Što budzie mienavita tak (biez varyjantaŭ i stroha pa śpisie viertykali), było zrazumieła z samaha pačatku. Imitacyjny charaktar palityčnaha pracesu pa-biełarusku byŭ raskručany pa poŭnaj: ułada rabiła vyhlad, što pravodzić tak zvanyja vybary, častka apazicyi i pryznačency ad ułady — što ŭ ich udzielničajuć. Była, viadoma, u apazicyi mahčymaść pracavać pavodle ŭłasnaha scenaru, ale, jak zvyčajna, hetamu niešta pieraškodziła. Dziela spraviadlivaści varta adznačyć, što sproby, i dosyć paśpiachovyja, rabilisia asobnymi palityčnymi partyjami i arhanizacyjami. Tut možna ŭspomnić AHP z kampanijaj «Za sumlennyja vybary biez Łukašenki», u miežach jakoj partyjnyja śpikiery prymusili pra siabie kazać i reahavać. Cenzura na vystupy, źmieny padčas kampanii praviłaŭ hulni Centralnaj kamisijaj pa vystupach davieranych asobaŭ, masavaje źniaćcie kandydataŭ — usio heta ŭniesła peŭnuju raznastajnaść u markotnuju nudu parłamienckaj kampanii. Hodna vyjšła z zaraśnikaŭ barščeŭnika Jarmošynaj i partyja BNF, jakaja nie dazvoliła vykarystoŭvać svaich kandydataŭ u jakaści dekaracyj. Prynieśli ŭładam niespakoj i arhanizacyi, jakija pieršapačatkova zajavili pra bajkot.

Adnak usio heta było istotna asłablena adsutnaściu adzinaj stratehii demakratyčnych sił i, na žal, nie stała častkaj žyćcia šarahovaha biełarusa.

Tym nie mienš, «ihnor-2012» z boku hramadstva adbyŭsia. Nielha adnaznačna śćviardžać, što ŭłada atrymała ad aburanaha hramadstva votum niedavieru. Prosta, ćviaroza aceńvajučy i rolu «deputataŭ» u palityčnaj sistemie Biełarusi, i sutnaść samich «vybaraŭ», ludzi nie stali marnavać čas na hłupstva.

Padliki naziralnikaŭ pakazali, što jaŭka ŭ spalnych rajonach skłała ad 25 da 35%. Heta adsotkaŭ na 8–9 nižej, čym 4 hady tamu, kali naziralniki zafiksavali jaŭku na hetych ža ŭčastkach ad 33 da 44%.

U razrezie ŭčastkaŭ (dzie niama internataŭ) pa adnoj asobna ŭziataj Homielskaj-Savieckaj akruzie № 34 heta vyhladaje tak:

Usie naziranyja ŭčastki ŭ akruzie (a ich było 28) pakazali bolš vysokuju jaŭku — 36,63% (ale heta sa studenckimi ŭčastkami, dzie hałasavać išli kałonami).

Hetym razam źviarnuli na siabie ŭvahu vielmi niervovyja pavodziny ŭładaŭ na ŭsich etapach kampanii. Naprykład, vydaleńnie naziralnikaŭ z učastkaŭ u rehijonie apošni raz było zafiksavanaje ŭ 2000 hodzie, a tut adrazu niekalki vypadkaŭ u kožnaj naziranym akruzie Homielskaj vobłaści.

Takaja niervovaść vytłumačalnaja, bo pustyja ŭčastki — pakazčyk staŭleńnia ludziej da ŭłady i jaje palityčnych machinacyj. Tym bolš što palityčnaja abyjakavaść, jak praviła, pierarastaje ŭ palityčnuju aktyŭnaść suprać ułady-bankruta.

Vasil Palakoŭ, AHP

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH

0

0

0

0

0

0