Jak jość, tak jość: kab prakinuć Michalčanku, amal 5 tysiač čałaviek «prahałasavali na damu»
A deputatkaj stała byłaja sudździa, staršynia harsavieta.
Adyjozny viadučy ANT, jaki stolki brudu vyliŭ na palitviaźniaŭ, pravaabaroncaŭ, prostych ludziej, usia vina jakich była ŭ tym, što jany navažylisia niedzie ŭ niečym vystupić suprać palityki Łukašenki, nadumaŭ stać deputatam.Pa svajoj inicyjatyvie.
Viertykal ža ŭ Połackaj akruzie vyłučyła pa ranžyry Natallu Hujvik— uradženku horada Kiraŭ, jakaja 13 hadoŭ pracavała sudździoj Połackaha rajona, a paśla była pavyšana da krajnie adkaznaj pasady staršyni Połackaha harsavieta.
«Hladzicie, jak prakinuli Michalčanka z ANT, — źviartaje ŭvahu Śviatłana Kalinkina. —
37,6% «hałasavali daterminova», 12,4% — «na damu». A tak ža nie byvaje!»— piša publicystka ŭ svaim Fejsbuku.
Sapraŭdy, na narmalnych vybarach, kali nie ŭ durdomie, daterminova hałasuje pracenty 2–3 ludziej — tyja, chto pierad dniom vybaraŭ daloka adjazdžaje, ale nie moža nie vykanać «hramadzianski abaviazak», a na damu — uvohule dziasiatyja doli pracenta (biezdapamožnyja invalidy).
Kali niedzie adbyvajecca inakš — heta jasnaja prykmieta mahčymych falsifikacyj.
A voś aficyjnyja vyniki hałasavańnia ŭ vybarčaj akruzie № 28:
«Usiaho vybarščykaŭ — 60941
Vybarščyki, jakija pryniali ŭdzieł u vybarach — 37767
Daterminova prahałasavała — 14202
Na učastku prahałasavała — 18870
Na vyjeździe pa miescy žycharstva — 4695
Niesapraŭdnyja biuleteni — 744
Hujvik Natalla Vasiljeŭna — 21231
Michalčanka Alaksiej Jakaŭlevič — 8399
Filimonaŭ Alaksiej Alaksandravič — 3326»
Vyjaznaja skrynka zvyčajna adna, maksimum try, na ŭčastak. Heta ž kolki treba pamatacca, kab pabyvać u tysiačach kvater i damoŭ!Niajnačaj, členy połackaj kamisii ź joj latali na miatle, kab usiudy paśpieć.
U realnaści hetyja ličby mohuć aznačać, što ŭ Połacku ŭdzieł u hetym farsie ŭziali dobra kali 10 ci 20 z 60 tysiač vybarcaŭ.
I što, «sudździa» i «jurystka» Hujvik nie razumieje hetaj miechaniki?Voś takija «sudździ» sudziać naš narod i takija, boža bieražy, «jurystki», na čale ź Jarmošynaj, vyrašajuć našy losy.
A Michalčanku nie treba ŭpadać u adčaj. Treba pacisnuć ruku tamu, chto akazaŭsia macniejšy, sabrać volu ŭ kułak, viarnucca na TV i jašče viarniej słužyć, i budzie i jamu ščaście, i nastupny raz 4695 žycharoŭ horada nad Dźvinoj prahałasujuć na damu za jaho.