Film «U tumanie» pa Bykavu atrymaŭ pryz na «Kinašoku»
Mastackaja stužka režysera Siarhieja Łaźnicy pa apovieści Vasila Bykava «Ŭ tumanie» adznačana na XXI Adkrytym festyvali kino krainaŭ SND, Łatvii, Litvy i Estonii «Kinašok-2012», jaki adbyŭsia ŭ Anapie.
Staršyniom žury sioleta byŭ piśmieńnik Uładzimier Vajnovič.
Pryz za najlepšuju mužčynskuju rolu atrymaŭ biełaruski aktor Uładzimier Śvirski, vykanaŭca hałoŭnaj roli puciavoha abchodčyka Suščeni.
Režyser filmu Siarhiej Łaźnica naradziŭsia ŭ Baranavičach. Karcinu źniali za 28 dzion u Łatvii. Heta mižnarodny kinaprajekt, jaho ŭdzielniki — «Biełaruśfilm», MA.JA.DE Fiction (Niamieččyna), kinakampanija «Džy Pi» (Rasieja), Rija Films (Łatvija), Lemming Film (Niderlandy), Fond padtrymki eŭrapiejskaha kino EURIMAGES.
Film «U tumanie» raniej atrymaŭ prestyžny pryz žury Mižnarodnaj federacyi kinapresy FIPRESCI na 65-m Mižnarodnym kinafestyvali ŭ Kanach, Hran-pry VI Mižnarodnaha kinafestyvalu imia Andreja Tarkoŭskaha «Lusterka», pryz «Załaty abrykos» na IX Mižnarodnym kinafestyvali ŭ Jerevanie i ŭznaharodu Adeskaha mižnarodnaha festyvalu.