U Hrodnie praciahvajecca rujnavańnie Novaha Śvietu — fota
U źniesienym budynku možna było b raźmiaścić muziej stvaralnika zaaparka Jana Kachanoŭskaha.
Stary pryvatny dom na vuł.17 Vieraśnia, 52, pabudavany na pačatku 1930-ch hadoŭ, faktyčna zrujnavany, piša «Tvoj styl».
Spakvala ŭłady ŭsio ž taki realizujuć svoj płan «čystki» lehiendarnaha kvartału ŭ staroj Harodni.
Šerah pryvatnych damoŭ pa vuł. 17 Vieraśnia (raniej — «Kresovaj»), jak miarkujuć historyki, paŭstaŭ na pačatku 1930-ch hh. Častka ź ich, jaki i źniesieny budynak, nosiać vyraznyja rysy kanstruktyvizmu.
Vyśvietlić dakładna, chto byŭ pieršapačatkovym uładalnikam źniesienaha doma, nie atrymałasia, adnak dakładna viadoma, što praz paru damoŭ ad jaho, na miescy sučasnaj 2-j škoły, stajaŭ padobny asabniak Jana Kachanoŭskaha — zakładalnika Haradzienskaha zaaparku.
U tyja časy rajon znachodziŭsia faktyčna na ŭskrajku horadu, miažujučy z uładańniami Druckich-Lubieckich dy byłoj zaharadnaj karaleŭskaj rezidencyjaj — Stanisłavova.
Technika kala dvuchpaviarchovaha draŭlanaha budynku pa vuł. 17-ha Vieraśnia, 52 źjaviłasia jašče na minułym tydni, što i vyznačyła jahony los.
Škada adnak, što znajšoŭšy hrošy na adbudovu zaaparku, nie znajšłosia mahčymaściaŭ, naprykład, na stvareńnie doma-muzieja Jana Kachanoŭskaha, niachaj i nie dakładna ŭ jahonym, ale ž vielmi blizkim va ŭsich sensach budynku.
Nie budziem zabyvacca, da prykładu, što dom, dzie žyła siamja Bahdanovičaŭ, nie zachavaŭsia, a litaraturny muziej znachodzicca ŭ inšym budynku toj epochi.
Niekalki pakojčykaŭ muzieja Bahdanoviča dobra adlustroŭvajuć byt darevalucyjnaj Harodni. Dyk čamu b nie paŭstać u adnym z pryvatnych damoŭ Novaha Śvietu anałahičnamu muzieju z atmaśfieraj mižvajennaha horada (uziaŭšy imia taho ž Jana Kachanoŭskaha)?
