Miaśnikovič: stabilizacyja kursu adbudziecca ŭ dva etapy

Vyhladaje, što Nacbank vierniecca da rehulavańnia kursu rubla nie raniej za červień ci lipień.

Prem'jer-ministr Michaił Miaśnikovič zajaviŭ žurnalistam, što ŭnifikacyja kursu nacyjanalnaj valuty budzie ažyćcioŭlenaja ŭ bližejšy čas. Heta budzie adbyvacca ŭ dva etapy. «Na pieršym etapie buduć pryniatyja rašeńni, kab źbić pavyšany popyt, a paśla atrymańnia stabilizacyjnaha kredytu kurs budzie farmavacca na padstavie popytu i prapanovy, što źnizić tyja [devalvacyjnyja] čakańni, jakija siońnia pakul jašče prysutničajuć», — skazaŭ premjer.

Na fonie maŭčańnia Łukašenki i Prakapoviča — aŭtaraŭ raniejšaj finansavaj palityki — słovy Miaśnikoviča prahučali jak uziaćcio adkaznaści za budučyja rašeńni na siabie.

Jak vyhladaje,

pieršym etapam stanie źnižeńnie kursu rubla da maksimalna nizkaha ŭzroŭniu, što maje źbić popyt na valutu. Druhi etap, na jakim praduhledžana vyznačeńnie novaha stabilnaha kursu rubla i padtrymańnie jaho z dapamohaj rehulatyŭnych mieraŭ, adkładajecca na paśla atrymańnia kredytu

 — h.zn. na červień, a moža navat lipień. Značyć, u Nacbanka pa-raniejšamu niama nijakich valutnych zapasaŭ dla ŭździejańnia na rynak.

Pakul rana hadać, jakim budzie hety novy stabilny kurs. Ale z ulikam apošnich padziej možna mierkavać, što ličby 5000 ci 6000 rubloŭ za dalar nie vyklučanyja.

Urad i Nacbank Biełarusi ŭ paniadziełak-aŭtorak prymuć rašeńni dla stabilizacyi situacyi na valutnym rynku, zajaviŭ Miaśnikovič.

Na sustrečy z žurnalistami, frahmienty jakoj byli pakazanyja biełaruskimi telekanałami, kiraŭnik urada nahadaŭ, što Biełaruś na praciahu troch hadoŭ čakaje kredytnuju padtrymku z Antykryzisnaha fondu JeŭrAzES u pamiery 3 młrd dołaraŭ.

«Płanujecca, što ŭ kancy maja — pačatku červienia buduć pryniatyja adpaviednyja rašeńni», — skazaŭ Miaśnikovič.

«Pieršy tranš kredytu aceńvajecca dzieści ŭ 800 młn dołaraŭ, dzieści ŭ pačatku vosieni budzie druhi tranš, krychu bolš za 400 młn dołaraŭ u raźliku na toje, što, u pryncypie, na try hady — 3 młrd. dołaraŭ», — paviedamiŭ Miaśnikovič.

«Ale ja chaču, kab usie razumieli — heta nie tyja srodki, jakija mohuć stabilizavać stan spraŭ na valutnym rynku.

Dla hetaha nieabchodnyja surjoznyja ŭłasnyja rašeńni, jakija my budziem prymać razam z Nacbankam litaralna ŭ paniadziełak-aŭtorak», — skazaŭ prem'jer-ministr.

Jon dapoŭniŭ, što hetyja rašeńni «vyznačać svajho rodu darožnuju kartu, kab padyści davoli padrychtavanymi i vykanać nieabchodnyja pracedury, u pieršuju čarhu heta tyčycca skaračeńnia hrašovaj prapanovy».

Siarhiej Hiezhała

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH