Tajna karaleŭskaj ułady
Oskaraŭski film «Karol havoryć!» z Kolinam Fiortam i Džefry Rašam
«Karol havoryć!» (The King's Speech)
Vialikabrytanija — ZŠA — Aŭstralija, 2010, kalarovy, 118 chv.
Režysior: Tom Huper
Roli vykonvajuć: Kolin Fiort, Džefry Raš, Hiełena Bonem-Karter, Derek Jakabi, Robert Porteł, Rodžer Hemand
Žanr: Historyka-bijahrafičnaja drama pa scenaru Dejvida Sejdlera
Pryzy: «Oskar» za lepšy film, lepšuju režysuru, lepšaha hałoŭnaha akciora, lepšy scenar
Adznaka: 7 (z 10)
Prync Albiert zaikajecca, i jamu ciažka vykonvać svaje pradstaŭničyja abaviazki. Lekary nie dapamahajuć. Prync źviartajecca da łahapieda Łajaneła Łoha, u jakoha svaje nieartadaksalnyja mietady. Ale situacyja ŭskładniajecca: nieŭzabavie Albiert musić stać karalom.
Karcina Toma Hupera — strymany bijahrafičny film. U stužcy niama dzikich skandałaŭ i tryźnieńniaŭ, niama abaviazkovych psichaanalityčnych korpańniaŭ, praźmiernaha pafasu i zalimitnaj mieładramatyčnaj raskošy.
Film — historyja karaleŭskaha siabroŭstva, razyhranaja Kolinam Fiortam i Džefry Rašam. Abodvum aktoram niama patreby vykarystoŭvać tannyja efiekty, šakavać publiku j korpacca ŭ brudnaj bialiźnie (chacia ŭ Džefry Raša jość dośvied markiza de Sada).
Amierykanski film raspaviadaje pra tajnu karaleŭskaj ułady. Brytanskija karali carujuć, ale nie kirujuć, navat teksty, jakija jany pramaŭlajuć — čužyja. Ale jość karaleŭski hołas. Na pačatku karciny hety hołas źbivajecca, dryžyć, zaikajecca. Naprykancy — jon zahučyć hučna j jasna. Pamiž hetymi padziejami — starannaja praca, ciažkija abaviazki — i siabroŭstva.
Žyvie karol!
