Kancert «Lapisaŭ» u Homieli admianili z-za... anšłahu

Uviečary 9 sakavika ŭ aficyjnaj hrupie homielskaha kancerta «Lapisa Trubiackoha» ŭ sacyjalnaj sietcy «Vkontaktie» arhanizatary paviedamili pra admienu padziei.

Pavodle dastupnaj infarmacyi, kancert byŭ «adkładzieny na niavyznačany termin z pryčyny niehatoŭnaści manieža pryniać stolki ludziej».

Hurt «Lapis Trubiackoj» płanavaŭ vystupić u lohkaatletyčnym kompleksie «Dynama» 13 sakavika ŭ ramkach turu ŭ padtrymku śviežaha alboma «Viesiołyje kartinki». 4 sakavika ŭžo paviedamlałasia, što kancert u Homieli pad pahrozaj zryvu. U administracyi kompleksa «Dynama» paviedamili, što kala tydnia tamu supracoŭniki MNS pravodzili pravierku pažarnaj biaśpieki budynka i vynieśli šerah pradpisańniaŭ.

Jak raniej paviedamlałasia, menedžmient hrupy pradbačyŭ takoje raźvićcio padziej. «Pavodle našaj infarmacyi, kancert sapraŭdy pad pahrozaj zryvu, — skazaŭ Źmicier Biezkaravajny ŭ efiry prahramy «Druhi płan «TUT.BY-TB. — Arhanizataram kancertu — Homielskamu haradskomu centru kultury — pastupiła nieaficyjnaje rasparadžeńnie z meryi horada. Nakolki mnie viadoma, ciapier HCK rychtuje aficyjnaje abhruntavańnie pryčyny admieny kancertu. Chutčej za ŭsio, heta buduć jakija-niebudź nadzvyčajnyja techničnyja abstaviny albo źviazanyja z MNS».

Praktyčna na ŭsich FM-stancyjach Biełarusi, kali nie na ŭsich, hurt źniali z ratacyi na niefarmalny zahad słužboŭcaŭ, paviedamiŭ Źmicier Biezkaravajny. Raniej u internecie źjaviłasia adskanavanaja kopija nibyta śpisu ab zabaronie na ratacyju ŭ biełaruskich elektronnych ŚMI niekatorych hurtoŭ i artystaŭ. U śpisie byli i «Lapisy».

ale.by

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH