«Jak možna źmienšyć košt pasłuhi adrazu na 40 pracentaŭ?» Stamatołahi pra namiery Minzdaroŭja abmiežavać ceny
Čynoŭniki zajaŭlajuć, što takoje rehulavańnie nieabchodna, kab pavysić dastupnaść płatnych stamatałahičnych pasłuh dla nasielnictva. Stamatołahi ž ličać, što heta papulizm ź niezrazumiełymi metami.
Ilustracyjnaje fota: belstom.by
«Buduć štrafavać…»
Ministerstva achovy zdaroŭja zajaŭlaje, što ciapier u klinikach, niezaležna ad vidu ŭłasnaści, nie mohuć być taryfy, vyšejšyja za vyznačanyja pastanovaj. Jana pavinna nabyć moc da kanca 2023 hoda. Ale pakul havorka idzie tolki ab prajekcie pastanovy i instrukcyi, u jakich buduć prapisanyja maksimalnyja taryfy na stamatałahičnyja pasłuhi.
Za ceny na rynku stamatałahičnych pasłuh uzialisia jašče ŭletku. 6 lipienia ŭrad unios źmieny ŭ pastanovu 2015 hoda ab rehulavańni taryfaŭ na płatnyja miedycynskija pasłuhi.
U vyniku pad «unarmavańnie» cen trapili ŭsie stamatałahičnyja pasłuhi.
Kali raniej abmiežavańni tyčylisia artapiedyčnaj stamatałohii i zubatechničnych rabot, to ciapier samastojna nielha pavyšać taryfy na terapieŭtyčnuju, chirurhičnuju dy artadantyčnuju stamatałohiju.
«Na naradach z čynoŭnikami nam davodzili, što źmieny ŭniesienyja, kab nasielnictvu byli dastupnyja stamatałahičnyja pasłuhi. My ž nie suprać, ale čynoŭnikaŭ nie chvalujuć našy prablemy z zatratami na nabyćcio tych ža raschodnych materyjałaŭ», — kamientuje situacyju stamatołah pryvatnaj kliniki.
Jon nie hatovy havaryć, jak paŭpłyvajuć na pryvatnuju stamatałohiju abiacanyja novaŭviadzieńni ŭradu i Minzdaroŭja, bo pakul ad ich hučać tolki zajavy ab namierach.
«U nas užo byli kantralory, jakija praviarali naša cenaŭtvareńnie. Rekamiendacyj nijakich nie było. Ź niepakojem čakajem reakcyi. Dapuskajem, što buduć štrafavać», — kaža stamatołah.
«Viadoma ž, možna pracavać na savieckim abstalavańni i brać tannyja raschodniki»
Surazmoŭca dadaje, što Minzdaroŭja ŭžo ŭmiešvajecca ŭ vyznačeńnie normaŭ raschodu materyjałaŭ i času akazańnia pasłuh.
Raniej kožnaja stamatałahičnaja klinika vyličvała heta, abapirajučysia na ŭłasny dośvied. Składalisia akty, jakija zaćviardžalisia hałoŭnym doktaram.
«Lekary śpisvali materyjały pry lačeńni, i pacyjent płaciŭ za faktyčna vykarystany abjom. Ale materyjałaŭ u stamatałohii mnostva i jak čynoŭniki heta ŭsio ŭnifikujuć, ciažka ŭjavić», — adznačaje surazmoŭca.
Jaho kaleha zaŭvažaje, što ŭva ŭsim śviecie stamatałohija «duža darahaja».
Pavodle jaho słoŭ, u canu pasłuh zakładajecca čałaviečy faktar — doktar doŭha vučycca, prachodzić śpiecyjalizacyju, darahija kursy. Uličvajecca sama praca i, viadoma ž, košt raschodnych materyjałaŭ. Da taho ž, u stamatałohii vykarystoŭvajecca darahoje abstalavańnie.
«Viadoma ž, možna pracavać na savieckim abstalavańni, brać tannyja raschodniki i jak vynik — tannaja, ale kiepskaj jakaści praca», — zaŭvažaje jon.
Na vystavie «Stamatałohija Biełarusi — 2018» svaju pradukcyju pakazali 12 krain. Siarod ich Aŭstryja, Hiermanija, Izrail, Litva, Finlandyja, Čechija, Šviejcaryja, Paŭdniovaja Kareja, Japonija. Ciapier pra takuju pradstaŭničaść biełaruskim čynoŭnikam davodzicca tolki maryć. Fota: minzdrav.gov.by
Surazmoŭca ličyć, što varta havaryć nie pra darahoŭlu stamatałahičnych pasłuh, a biezhrašoŭje nasielnictva, jakoje prosta nie maje srodkaŭ na toje, kab lačyć zuby.
U Biełarusi dahetul nie zaćvierdžany minimalny sacyjalny standart u stamatałohii, i čynoŭniki namahajucca jaho zamianić rehulavańniem cen.
U krainach, dzie takija standarty jość, dziaržava zabiaśpiečvaje toj minimum, jaki jana moža sabie dazvolić.
«Naprykład, samyja prostyja płomby, samyja prostyja pratezy. Za toje, što zvyš taho, pacyjent płacić sa svajoj kišeni», — tłumačyć jon.
«Sumnieŭna, kab možna było źmienšyć košt pasłuhi adrazu na 40 pracentaŭ»
U Biełarusi 61 stamatałahičnaja paliklinika, 49 artapiedyčnych adździaleńniaŭ i bolš za 800 pryvatnych stamatałahičnych klinik.
Rektar Biełaruskaha dziaržaŭnaha miedycynskaha ŭniviersiteta i pa sumiaščalnictvie hałoŭny pazaštatny stamatołah Ministerstva achovy zdaroŭja Siarhiej Rubnikovič u lipieni zapeŭnivaŭ, što pad rehulavańnie trapiać dziaržaŭnyja i pryvatnyja kliniki.
Ź jaho słoŭ, vysokija ceny na stamatałohiju źviazanyja z koštam raschodnych materyjałaŭ.
«Na žal, šmatlikija ź ich zakuplajucca ŭ blizkim i ŭ dalokim zamiežžy. Kali vydatki na materyjały buduć źmianšacca, budzie źmianšacca i košt stamatałahičnaj pasłuhi», — pryznavaŭ Siarhiej Rubikovič.
Ministerstva achovy zdaroŭja vykazvałasia, što asobnyja pryvatnyja kliniki ŭstanaŭlivali «nieabhruntavana vysokija taryfy» na stamatałahičnyja pasłuhi. Heta było vyjaŭlena padčas pravierak letam 2023 hoda.
Viedamstva prahnazuje, što pa ŭviadzieńni novych cen pasłuha, naprykład, «vydaleńnie małočnaha zuba» ŭ siarednim stanie tańniejšaj na 33%, (było 127 rubloŭ, stanie 85,60), «składanaje vydaleńnie» — na 42%, (było 479 rubloŭ, stanie 278), «lačeńnie siaredniaha karyjesu» — na 47% (było 163 rubloŭ, stanie 86,40).
Pavodle Minzdaroŭja, takija raźliki byli zroblenyja ŭ vyniku analizu taryfaŭ 32 arhanizacyj, jakija akazvajuć nierehularnyja stamatałahičnyja pasłuhi (16 — dziaržaŭnych, 16 — niedziaržaŭnych ustanoŭ).
«Takija prahnozy vyhladajuć zvyčajnym papulizmam, raźličanym na čałavieka, jaki nie viedaje cenaŭtvareńnia ŭ stamatałohii. Sumnieŭna, kab možna było źmienšyć košt pasłuhi adrazu na 40 pracentaŭ», — adznačaje supracoŭnik pryvatnaj kliniki.
Pa jaho słovaŭ, kali jon tolki pryjšoŭ na internaturu, to ŭ kabiniecie hałoŭnaha doktara na školnaj došcy byli napisanyja dźvie ličby: pieršaja — pamier biudžetnaha finansavańnia na adno naviedvańnie pacyjentam, a druhaja — košt naboru dla ahladu: para palčatak, instrumient, maska.
Pieršaja ličba razy ŭ dva była mienšaja za druhuju. Jon kaža, što płatnyja pasłuhi padtrymlivajuć naležny ŭzrovień akazańnia dapamohi pacyjentu. Možna pieradać niejkija materyjały na biudžetny pryjom, ale pry hetym zabaroniena rabić naadvarot.
Začystka rynku, niedachop miedykaŭ, nie jedzie «pacyjent z hrašyma»
Nie vyklučajuć surazmoŭcy, što za namierami čynoŭnikaŭ «urehulavać ceny» schavana sproba «začyścić rynak».
Pa ich słovach, siamja hałoŭnaha pazaštatnaha stamatołaha Minzdaroŭja Siarhieja Rubnikoviča vałodaje ŭ Minsku niekalkimi pryvatnymi klinikami. Svoj biznes jany chočuć pašyryć, zaniaŭšy miesca tych lakarniaŭ, jakija zbankrutujuć ci nie zachočuć pracavać u novych umovach.
Istotnym zastajecca i toje, što ŭ pryvatnych klinikach zarablajuć bolš i tudy iduć miedyki ź dziaržaŭnych paliklinik, a heta viadzie da taho, što tam nie chapaje piersanału.
Rekłamny ščyt na miažy z Polščaj. Fota: telehram-kanał «Briest. Hłavnoje!»
Stamatołahi taksama adznačajuć, što ŭ dakavidny čas u Biełaruś pryjazdžali lačyć zuby zamiežniki: palaki, litoŭcy, navat izrailcianie. Ciapier ich niama. Kab viarnuć «pacyjenta z hrašyma», vystaŭlajuć rekłamnyja ščyty na miažy.
Naohuł ža, zajaŭlajuć surazmoŭcy, u patuhach čynoŭnikaŭ «refarmavać» miedycynu nie zrazumieła, što jany ź joju chočuć zrabić».
«Naša Niva» — bastyjon biełaruščyny
PADTRYMAĆHladzicie taksama:
Sučasnyja mietodyki ŭ dohladzie zuboŭ: raspaviadajuć pieradavyja minskija stamatołahi
