Sankcyi i vajna. Uładalnica cłonimskaj sinahohi admoviłasia ad jaje rekanstrukcyi, dziela jakoj pradała minskuju kvateru
Dziciačaja piśmieńnica Iłona Karavajeva likvidavała fond «Ratujučy spadčynu», jaki źbiraŭ srodki na rekanstrukcyju sinahohi XVII stahodździa ŭ Słonimie. Jana vykupiła abjekt na aŭkcyjonie ŭ kancy 2020 hoda i pradała dziela hetaha kvateru ŭ Minsku. Adnaŭleńniu sinahohi pieraškodzili sankcyi i vajna va Ukrainie, raspaviała piśmieńnica Hrodna.life. Inviestaraŭ albo dziaržaŭnych prahram dla padtrymki prajekta taksama nie znajšłosia.
14 červienia ŭ Hrodzienskim abłasnym sudzie likvidavali fond «Ratujučy spadčynu». Inicyjataram vystupiła sama jaho zasnavalnica. Prajektam rekanstrukcyi sinahohi jana nie budzie zajmacca — nie znajšłosia mahčymaściaŭ jaho prafinansavać. Iłona paviedamić pra heta pradaŭcu — Słonimskamu rajvykankamu. Vierahodna, abjekt vierniecca ŭ jaho ŭłasnaść.
Iłona Karavajeva, jakaja piša knihi pad psieŭdanimam Iaana Ryŭz, u kancy 2020-ha vykupiła budynak sinahohi za 27 tysiač rubloŭ. Pa ŭmovach aŭkcyjonu, novy ŭłaśnik pavinien byŭ na praciahu dvuch hadoŭ padać prajektnuju dakumientacyju. Na praciahu piaci hadoŭ treba było zrabić prajekt rekanstrukcyi budynka. Iłona mierkavała, što budynak moža stać kropkaj pryciahnieńnia turystaŭ, a na jaho terytoryi buduć prachodzić kulturnyja mierapryjemstvy.
Iaana Ryŭz (Iłona Karavajeva) — ułaśnica sinahohi ŭ Słonimie. Fota belkniga.by
Za čas pracy atrymałasia sabrać nievialikuju sumu — kala 2700 rubloŭ. Ich nakiravali na rekłamu pa pryciahnieńni ŭvahi da spadčyny. Padčas rekłamnaj kampanii pačalisia vajennyja dziejańni va Ukrainie. Pastupleńni ad biełarusaŭ spynilisia.
Da hetaha dadalisia i sankcyi. Navat kali čałaviek i choča dapamahčy, to ź inšych krain pieravieści hrošy stała ciažka.
«Usio heta robić niemahčymym vykanańnie metaŭ fondu», — raspaviała Iłona Hrodna.life. Dziaržaŭnyja prahramy, jakija mahli b padtrymać prajekt rekanstrukcyi sinahohi, taksama adsutničali. «Samavityja» inviestary nie zachacieli prafinansavać prajekt.
- Słonimskaja sinahoha — pomnik architektury baroka — była pabudavanaja ŭ 1642 hodzie. Jana ŭklučanaja ŭ Dziaržaŭny śpis historyka-kulturnych kaštoŭnaściaŭ Biełarusi. U 1881 hodzie budynak mocna paciarpieŭ padčas vialikaha pažaru, ale byŭ adbudavany na achviaravańni haradžan. Sinahoha dziejničała da 1940 hoda. Paśla Druhoj suśvietnaj vajny tut raźmiaščaŭsia skład i handlovyja pamiaškańni.
