Ministr abarony Chrenin: Idzie hłabalnaja proksi-vajna z udziełam transnacyjanalnych elit
Pra heta ministr abarony Viktar Chrienin zajaviŭ, vystupajučy ŭ Maskvie na kanfierencyi pa mižnarodnaj biaśpiecy.
Fota Minabarony
«U chodzie sumiesnaj apieracyi biełaruskich i rasijskich śpiecsłužbaŭ była spyniena padrychtoŭka buntu ź fizičnym źniščeńniem kiraŭnika biełaruskaj dziaržavy i členaŭ jaho siamji. Pryčym na siońniašni momant śledstvam vykrytyja nieabvieržnyja dokazy datyčnaści da hetaha amierykanskich dziaržaŭnych struktur», — skazaŭ ministr.
Jon adznačyŭ, što siońnia idzie hłabalnaja proksi-vajna za budučuju madel śvietabudovy pamiž transnacyjanalnymi i nacyjanalnymi elitami. Meta pieršych — skinuć niezaležnyja ŭrady, ścierci dziaržaŭnyja miežy pamiž krainami. Najlepšym srodkam dla hetaha, na ich dumku, źjaŭlajecca «stratehija kiravanaha chaosu», paviedamlaje Minabarony.
Mienavita ŭ jaje ramkach prymianiajucca sučasnyja kancepcyi «kalarovych revalucyj» i «hibrydnych vojnaŭ». Na stvareńnie kiravanaha chaosu «pracuje» i usiepłanietnaja pandemija karanavirusa. Stvarajucca ŭmovy, kab u takim chaosie razburyć dziaržavy i zachapić ich nacyjanalnyja bahaćci.
Viktar Chrenin adznačyŭ, što biełaruski narod taksama byŭ uciahnuty ŭ hety «hłabalny chaos», nie razumiejučy jahonych sapraŭdnych metaŭ i pryznačeńnia.
Jon taksama dadaŭ, što ź vialikaj vierahodnaściu možna prahnazavać abvastreńnie baraćby ŭ «postkaranavirusny» pieryjad.
«Łamać» niezaležnyja dziaržavy praciahnuć usimi mahčymymi sposabami.
Biełaruskaje vajennaje viedamstva bačyć, što ŭžo ciapier prymajecca ceły kompleks mier.
Siarod hetych mier:
— dyskredytacyja mižnarodnych instytutaŭ biaśpieki;
— razbureńnie architektury mižnarodnych dahavoraŭ u halinie mižnarodnaj biaśpieki i kantrolu nad uzbrajeńniami, vykarystańnie jurydyčnych niestykovak dla adnaŭleńnia rabot pa stvareńni bijałahičnaj zbroi;
— pryvučvańnie mižnarodnaj hramadskaści da dumki pra niepaźbiežnaść vajennych sutyknieńniaŭ u budučyni;
— raspracoŭka asobnymi dziaržavami novych stratehičnych ustanovak, formaŭ i mietadaŭ viadzieńnia vojnaŭ;
— transfarmacyja amierykanskaha vajennaha prysutnaści ŭ Jeŭropie;
— ekspansija ŭ kaśmičnuju i kibierprastoru dla budučaha viadzieńnia vajennych dziejańniaŭ.
Taksama Viktar Chrenin dadaŭ, što Biełaruś uzmocnić rehijanalnuju hrupoŭku vojskaŭ z Rasijaj, budzie raźvivać intehracyju ŭ Sajuznaj dziaržavie, ADKB, Jeŭrazijskim ekanamičnym sajuzie.
Jon skazaŭ, što incydent z Ryanair vykarystoŭvali dla źnižeńnia tranzitnaha patencyjału Biełarusi.
